विदेशी ऋण नलिने निर्णयः धरानका मेयर साम्पाङले एडीबी ऋणप्रति असहमति जनाउँदै सरकारलाई पत्र

सुनसरी । धरान उपमहानगरपालिकाका नगरप्रमुख हर्कराज राई (हर्क साम्पाङ) ले आगामी दिनमा एसियाली विकास बैंक (ADB) बाट कुनै पनि प्रकारको ऋण नलिने स्पष्ट घोषणा गरेका छन् ।

तीन दशकदेखि खानेपानी अभाव झेलिरहेको धरानको दीर्घकालीन समाधानका लागि सप्तकोशीबाट पानी ल्याउने योजनालाई अघि बढाउन संघीय सरकारले चालु आर्थिक वर्ष २०८२/०८३ मा ४ करोड रुपैयाँ बजेट विनियोजन गरिसकेको छ । तर बाँकी खर्च एसियाली विकास बैंक (ADB) बाट ऋणको रुपमा ल्याउने तयारी भइरहेको जानकारी पाएपछि मेयर राईले त्यसप्रति असहमति जनाएका हुन् ।

खानेपानी मन्त्रालयलाई बिहीबार पठाइएको पत्रमा उनले लेखेका छन्, ‘देशलाई विदेशी ऋणको भार बोकाएर योजनाको कार्यान्वयन गर्नु उचित हुँदैन । धरान उपमहानगरपालिकाले यसअघि लिएको ADB ऋण समेत अझै तिर्न बाँकी छ । यस्तो अवस्थामा नयाँ ऋण थप्नु सान्दर्भिक देखिन्न ।’

उनले आफ्नै राष्ट्रिय आम्दानी र स्रोतको प्रयोग गरेर मात्रै योजना अघि बढाउन सरकारलाई आग्रह गरेका छन् । अन्यथा, स्थानीय खोला र खोल्सीहरूको प्रयोग गरेर खानेपानीको व्यवस्था गर्ने जानकारी पनि पत्रमार्फत दिएका छन् ।

यस पत्रको बोधार्थ प्रधानमन्त्री तथा मन्त्रिपरिषद्को कार्यालय, अर्थ मन्त्रालय तथा धरान उपमहानगरपालिकाका प्रमुख प्रशासकीय अधिकृतलाई समेत पठाइएको छ ।