सर्लाही–४ मा अमरेशको जित, गगन थापाको १८ वर्षे संसदीय यात्रामा ब्रेक

काठमाडौं । सर्लाही क्षेत्र नम्बर ४ मा भएको निर्वाचनमा राष्ट्रिय स्वतन्त्र पार्टी (रास्वपा) का उम्मेदवार अमरेशकुमार सिंहले नेपाली कांग्रेसका सभापति गगन थापालाई पराजित गरेका छन् । आइतबार बिहान सार्वजनिक भएको अन्तिम मतपरिणाम अनुसार सिंहले थापालाई १२ हजार ८५७ मतान्तरले हराएका हुन् ।

निर्वाचन परिणाम अनुसार अमरेश कुमार सिंहले ३५ हजार ६८८ मत प्राप्त गर्दा गगन थापाले २२ हजार ८३१ मत ल्याएका छन् । यस पराजयसँगै थापाको २०६४ सालदेखि सुरु भएको संसदीय यात्रा पहिलोपटक अवरुद्ध भएको छ ।

गगन थापा पहिलोपटक २०६४ सालको संविधानसभा निर्वाचनमा समानुपातिक प्रणालीबाट सांसद बनेका थिए । त्यसपछि उनले काठमाडौं निर्वाचन क्षेत्र नम्बर ४ बाट लगातार तीन पटक निर्वाचन जितेका थिए । हालै सम्पन्न नेपाली कांग्रेसको महाधिवेशनबाट उनी पार्टीको सभापतिमा निर्वाचित भएका थिए र कांग्रेसले उनलाई भावी प्रधानमन्त्रीका रूपमा पनि अघि सारेको थियो ।

थापाको राजनीतिक यात्रा विद्यार्थी राजनीतिबाट सुरु भएको हो । २०५१ सालमा त्रिचन्द्र क्याम्पसमा स्वतन्त्र विद्यार्थी युनियन (स्ववियु) सदस्यमा निर्वाचित भएका उनी २०५५ सालमा सोही क्याम्पसको स्ववियु सभापति बनेका थिए । त्यसपछि नेपाल विद्यार्थी संघमा २०५७ सालमा उपाध्यक्ष र २०५९ सालमा महामन्त्री बनेका थिए ।

गणतन्त्रको पक्षमा खुलेर वकालत गर्ने नेताका रूपमा परिचित थापा २०६२–०६३ को जनआन्दोलनमा सक्रिय रहे । त्यसै आन्दोलनले उनलाई राष्ट्रिय राजनीतिमा थप चर्चित बनायो । उनी २०७० सालमा स्वास्थ्य मन्त्री समेत बनेका थिए । अहिले उनी राजनीतिमा पुस्तान्तरणको एजेन्डा उठाउँदै आएका छन् ।

उता सिंह लामो समयदेखि सर्लाहीको राजनीतिमा सक्रिय नेताका रूपमा चिनिन्छन् । उनको जन्म सन् १९७० सेप्टेम्बर ५ मा सर्लाहीको बलरा क्षेत्रमा भएको हो । उनले भारतको जवाहरलाल नेहरू विश्वविद्यालयबाट अन्तर्राष्ट्रिय सम्बन्ध विषयमा पीएचडी गरेका छन् ।

सिंहको राजनीतिक यात्रा मधेशकेन्द्रित आन्दोलनबाट सुरु भएको थियो । उनले सुरुवातमा मधेशी जनाधिकार फोरमबाट राजनीति सुरु गरेका थिए । पछि नेपाली कांग्रेसमा प्रवेश गरेर सक्रिय राजनीति गर्दै आएका उनी २०७० र २०७४ सालको प्रतिनिधिसभा निर्वाचनमा सर्लाही–४ बाट सांसद निर्वाचित भएका थिए ।

२०७९ सालको निर्वाचनमा कांग्रेसबाट टिकट नपाएपछि उनले स्वतन्त्र उम्मेदवारी दिएका थिए र पुनः निर्वाचित भएका थिए । पछिल्लो पटक भने उनी राष्ट्रिय स्वतन्त्र पार्टीबाट उम्मेदवार बनेका थिए ।

संसदमा आक्रामक शैलीका अभिव्यक्ति र असामान्य गतिविधिका कारण सिंह बेलाबेला चर्चामा आउने गरेका छन् । उनले अघिल्लो समय बालेन शाह प्रधानमन्त्री नबने जनकपुरमा आत्मदाह गर्ने र आफू चुनावमा नजिते आत्महत्या गर्ने जस्ता विवादास्पद अभिव्यक्ति दिएका थिए ।