तातोपानी नाकाबाट पहिलोपटक कन्टेनरमा आयात भयो हेलिकप्टर

काठमाडौं । तातोपानी भन्सार नाका हुँदै पहिलोपटक हेलिकप्टर भित्रिएको छ । माउन्टेन हेलिकप्टर प्रालिले फ्रान्समा निर्मित एयरबस कम्पनीको हेलिकप्टर चीनको बाटो हुँदै तातोपानीसम्म ल्याएको हो ।

कम्पनीका कर्पोरेट म्यानेजर रामचन्द्र भुसालका अनुसार उक्त हेलिकप्टरलाई ४० फिटे कन्टेनरमा लोड गरेर ल्याइएको हो । पंखा लगायतका मुख्य पार्टपूर्जा खोलेर कन्टेनरभित्र राखिएको हेलिकप्टर हाल तातोपानी भन्सार कार्यालयमा परीक्षण र कागजी प्रक्रिया पूरा गर्ने चरणमा छ ।

‘फिटिङको काम तातोपानीमै हुन्छ, त्यसपछि सबै प्रक्रिया पूरा गरेर उडाएर काठमाडौं ल्याइन्छ,’ भुसालले जानकारी दिए ।

भन्सार प्रमुख राजेन्द्र प्रसाद चुडालले पनि तातोपानी नाकाबाट पहिलोपटक हेलिकप्टर भित्रिन लागेको पुष्टि गरेका छन् । ‘मेरो कार्यकालमै पहिलोपटक यो किसिमको वस्तु आयात भएको हो,’ उनले भने, ‘जाँचपासका लागि १ प्रतिशत शुल्क र १३ प्रतिशत मूल्य अभिवृद्धि कर (भ्याट) लाग्नेछ ।’

माउन्टेन हेलिकप्टरले यसअघि एक हेलिकप्टर भारतको कलकत्ता बन्दरगाह हुँदै वीरगञ्जबाट काठमाडौं ल्याएको थियो । तर समुद्री बाटो झन्डै एक महिना लाग्ने भएकाले यसपटक कम्पनीले चीनको भू–मार्ग रोजेको हो ।

भुसालले भने, ‘तातोपानी नाका हुँदै चीनबाट ल्याउँदा ८–१० दिनमै हेलिकप्टर नेपाल ल्याउन सकिन्छ, त्यसैले यो मार्ग बढी उपयुक्त देख्यौं ।’

नेपाल प्रवेशका लागि चीनतर्फ दुई प्रमुख नाका छन्— तातोपानी र टिमुरे । टिमुरे नाका साँघुरो र कठिन भएकाले तातोपानीमार्फत आयात गरिएको कम्पनीले जनाएको छ ।

जाँचपासपछि नयाँ हेलिकप्टर माउन्टेनको व्यावसायिक उडान सेवामा परिचालन गरिनेछ । यो हेलिकप्टरसहित माउन्टेन हेलिकप्टर प्रालिसँग अब तीनवटा हेलिकप्टर रहनेछन् ।