युके रोजगारीको नाममा ११ करोड ठगी, दुई जना काठमाडौंबाट पक्राउ

काठमाडौं । वैदेशिक रोजगारीको प्रलोभन देखाउँदै ११ करोडभन्दा बढी रकम ठगी गरेको अभियोगमा दुई व्यक्तिलाई प्रहरीले पक्राउ गरेको छ ।

पक्राउ परेकामध्ये एक मोरङको रतुवामाई नगरपालिका–१० निवासी ४४ वर्षीय लक्ष्मण पराजुली हुन् भने अर्का धनुषाको सबेला नगरपालिका–१२ निवासी ४७ वर्षीय अरुणराज शर्मा रहेका छन् ।

उनीहरुलाई काठमाडौं उपत्यका अपराध अनुसन्धान कार्यालयको टोलीले जेठ २५ गते नरेफाँटबाट पक्राउ गरेको हो। कार्यालयका प्रवक्ता तथा एसपी काजिकुमार आचार्यका अनुसार, पराजुली र शर्माले ३८ जनालाई युके पठाइदिने भन्दै ११ करोड ६ लाख ९७ हजार रुपैयाँ ठगेका थिए ।

हाल उनीहरुलाई थप अनुसन्धान तथा आवश्यक कानुनी कारबाहीका लागि वैदेशिक रोजगार विभाग, ताहाचल पठाइएको प्रहरीले जनाएको छ