नेपाली झोलामा बजेट ल्याउने अभ्यासः पुनले थाले, पौडेलले दिए निरन्तरता

काठमाडौं । अर्थमन्त्री विष्णप्रसाद पौडेलले चालु वर्षको बजेट पुस्तिका नेपाली कच्चा पदार्थबाट बनेको झोलामा राखेर संसदमा प्रस्तुत गरेका छन् । यो अभ्यास गत वर्षदेखि सुरु गरिएको हो, जुन पूर्वअर्थमन्त्री वर्षमान पुनले थालनी गरेका थिए ।

गत आर्थिक वर्ष २०८१÷८२ को बजेट पुस्तिका वर्षमानले गाँजाबाट निर्मित झोलामा राखेर संसद् भवनमा लगेका थिए । उनले नेपाली उत्पादनको प्रवर्द्धन गर्ने उद्देश्यले यस्तो अभ्यास थालेका थिए ।

यसअघि भने विदेशी छालाबाट बनेको महँगो ब्रिफकेसमा बजेट ल्याउने चलन रहँदै आएको थियो ।

अर्थ मन्त्रालयका अनुसार यो वर्ष पनि झोला नयाँ भए पनि त्यही परम्परा दोहोरिएको हो । मन्त्रालयले स्थानीय सामग्रीबाट बनेका झोलाको प्रयोगले स्वदेशी उत्पादनलाई टेवा पुग्ने विश्वास लिएको छ ।

अर्थमन्त्रीका प्रेस सल्लाहकार भुवन केसीका अनुसार सरकारको नीति नै स्थानीय उत्पादनलाई प्राथमिकता दिने भएकाले बजेट प्रस्तुतिमा पनि त्यसको अभ्यास गरिएको हो ।