रसुवा बाढीपीडितका लागि चीनको राहतको दोस्रो खेप काठमाडौंमा

काठमाडौं । रसुवामा बाढीपहिरोबाट प्रभावित नागरिकका लागि चीनले उपलब्ध गराएको आपत्कालीन राहत सामग्रीको दोस्रो खेप काठमाडौं आइपुगेको छ ।

चिनियाँ जनमुक्ति सेना (पीएलए) को वायुसेनाको विमानमार्फत मंगलबार साँझ राहत सामग्री त्रिभुवन अन्तर्राष्ट्रिय विमानस्थलमा ल्याइएको नेपालस्थित चिनियाँ दूतावासले जनाएको छ ।

राहत सामग्रीसँगै पाँच जना चिनियाँ डीएनए पहिचान विशेषज्ञसमेत नेपाल आएका छन् । उनीहरूले बाढीपहिरोमा परी बेपत्ता भएका तथा मृत्यु भएकाहरूको पहिचान गर्न नेपाली पक्षलाई प्राविधिक सहयोग गर्नेछन् ।

विमानस्थलमा नेपालका लागि चिनियाँ राजदूत झाङ माओमिङले राहत सामग्री विज्ञान, प्रविधि तथा नवप्रवर्तनमन्त्री महावीर पुनलाई हस्तान्तरण गरेका थिए । सो क्रममा मन्त्री पुनसहित नेपाली प्रतिनिधिले चिनियाँ विशेषज्ञ टोलीको स्वागत गरेका थिए ।

चीनबाट प्राप्त सामग्रीमा ड्रोन, डीएनए परीक्षणका उपकरण, पानी शुद्धीकरण सामग्री तथा उद्धार र खोजी कार्यमा प्रयोग हुने अन्य आवश्यक प्राविधिक उपकरण रहेका छन् ।