भोटेकोशी बाढीप्रति राष्ट्रपति पौडेलद्वारा दुःख व्यक्त, उद्धारमा जुट्न आग्रह

काठमाडौं । राष्ट्रपति रामचन्द्र पौडेलले रसुवा र नुवाकोट हुँदै बग्ने भोटेकोशी नदीमा बुधबार बिहान अचानक आएको बाढीबाट भएको जनधनको क्षतिप्रति गहिरो दुःख व्यक्त गरेका छन् ।

बाढीका कारण भएको क्षतिको खबरले आफू अत्यन्त दुःखी भएको जनाउँदै राष्ट्रपति पौडेलले विपद्को यस घडीमा उद्धार तथा राहतका कामलाई प्रभावकारी रूपमा अघि बढाउन सम्बन्धित सबै निकायलाई आग्रह गरेका छन् ।

उनले सरकार, राजनीतिक दल, सामाजिक संघसंस्था, सुरक्षा निकायलगायत सबै सरोकारवाला निकायलाई समन्वय गर्दै उद्धार र राहत कार्यमा तीव्रता दिन आह्वान गरेका छन् ।

राष्ट्रपति पौडेलले भोटेकोशी नदीको तल्लो तटीय क्षेत्रमा रहेका नागरिकलाई सम्भावित जोखिमप्रति सचेत रहन आग्रह गर्दै आवश्यक सावधानी अपनाउन पनि अनुरोध गरेका छन् । साथै, विपद्को समयमा आपसी समन्वय र सहयोगका साथ जुट्न उनले आम नागरिकलाई आग्रह गरेका छन् ।