नेपाल प्रहरीमा प्राविधिक पदमा भर्ना खुला, चैत २५ देखि आवेदन

काठमाडौं । नेपाल प्रहरीले प्राविधिक समूहअन्तर्गत ठूलो संख्यामा जनशक्ति भर्नाका लागि आवेदन आह्वान गरेको छ । प्रहरी प्रधान कार्यालयको मानवश्रोत विकास विभाग, भर्ना छनोट शाखाले शुक्रबार सूचना जारी गर्दै विभिन्न प्राविधिक उपसमूहका रिक्त पदहरू खुला प्रतिस्पर्धाबाट समावेशी प्रावधानअनुसार पूर्ति गर्न लागिएको जनाएको हो ।

जारी सूचनाअनुसार सूचना प्रविधि निर्देशनालय, सञ्चार निर्देशनालय, भौतिक पूर्वाधार निर्देशनालय, सवारी महाशाखा, केन्द्रीय विधि विज्ञान प्रयोगशाला तथा प्रहरी अस्पतालसहित विभिन्न निकायका लागि कुल ६०७ पदमा नयाँ भर्ना गरिनेछ ।

भर्ना खुला गरिएका पदहरूमा प्राविधिक प्रहरी नायव उपरीक्षक, प्रहरी निरीक्षक, प्रहरी नायव निरीक्षक र प्रहरी सहायक निरीक्षक समावेश छन् । यी पदका लागि चैत २५ गतेदेखि वैशाख २४ गतेसम्म आवेदन दिन सकिनेछ ।

यस्तै, प्राविधिक प्रहरी जवान पदका लागि भने चैत २६ गतेदेखि वैशाख ३१ गतेसम्म दरखास्त दिन सकिने व्यवस्था गरिएको सूचनामा उल्लेख छ ।

नेपाल प्रहरीले सूचना प्रविधि, सञ्चार, पूर्वाधार, सवारी, फरेन्सिक र स्वास्थ्य सेवाजस्ता प्राविधिक क्षेत्रलाई सुदृढ बनाउन यो भर्ना प्रक्रिया अघि बढाएको जनाएको छ ।