कोदारी खण्डको अरनिको राजमार्ग सञ्चालनमा, रोकिएका कन्टेनर आवत–जावत सुरु

काठमाडौं । पटक–पटकको अवरोधपछि अरनिको राजमार्गको कोदारी खण्ड पुनः सञ्चालनमा आएको छ । लामो समयदेखि पहिरोका कारण अवरुद्ध रहँदै आएको यो खण्डलाई अस्थायी रूपमा सुचारु गरिएको सडक विभागले जानकारी दिएको छ ।

वर्षाका कारण कोदारी क्षेत्रमा लगातार पहिरो झर्ने, ढुंगा र लेदो बग्ने, भोटेकोशी नदीको कटान हुनेजस्ता समस्याले राजमार्ग सञ्चालनमा चुनौती थपिँदै आएको थियो । सडक विभागका अनुसार ४ भदौ २०८२ मा १८ दिनपछि सडक खुलेको थियो तर त्यसपछि ९ भदौ र १६ भदौमा पुनः अवरुद्ध भएको थियो ।

अत्यधिक वर्षा, जोखिमयुक्त भौगोलिक अवस्थाले सडक मर्मतमा कठिनाइ भएको जनाइएको छ । त्यस्तै, पहिरोले स्थानीय बासिन्दाका घरमा क्षति पुर्याएको र उनीहरूबाट मर्मतमा अवरोध देखिएको विभागको भनाइ छ ।

२ असोजको राति परेको वर्षाले थप चार स्थानमा पहिरो जाँदा स्थिति अझै जटिल भएको थियो । हाल सडक विभागले पहिरोलाई अस्थायी रूपमा प्लास्टिकले ढाक्ने, ड्रिलिङ गरेर पानी निकास गर्ने उपाय अवलम्बन गरी राजमार्ग सञ्चालनमा ल्याएको छ । स्थायी समाधानका लागि डिजाइनको काम पनि अघि बढाइएको छ ।

यसबीच, ऊर्जा, जलस्रोत तथा सिँचाइ, भौतिक पूर्वाधार तथा यातायात तथा सहरी विकासमन्त्री कुलमान घिसिङले आइतबार सचिव केशव शर्मा, सडक विभागका महानिर्देशक विजय जैसी लगायतको टोलीसहित कोदारी क्षेत्रमा स्थलगत अनुगमन गरेका छन् । उनले पहिरोबाट सबैभन्दा प्रभावित इर्कु क्षेत्रका बासिन्दासँग छलफल गर्दै जोखिम न्यूनीकरण र दीर्घकालीन समाधानका उपायबारे विचार–विमर्श गरेका थिए ।

चाडपर्वको समय पारेर चीनसँगको प्रमुख व्यापारिक नाका बन्द हुँदा ठूलो संख्यामा कन्टेनरहरू भोटेकोशी नाकामा रोकिएका थिए । स्थानीयको अवरोधले पहिरो पन्छाउने कार्यमा पनि ढिलाइ भएको थियो । त्यसपछि मन्त्री घिसिङले स्थानीय नेतृत्वसँग संवाद गर्दै सहजीकरणको आग्रह गरेका थिए ।

हाल राजमार्ग सञ्चालनमा आएसँगै रोकिएका सयौँ कन्टेनरहरूले आवत–जावत गर्न थालेका छन्, जसले दशैंको सामान आपूर्तिमा सहजता ल्याउने अपेक्षा गरिएको छ ।