चन्द्रकुवेर खापुङ नेपाल प्रहरीको ३२औँ आईजीपीमा नियुक्त

काठमाडौं । नेपाल प्रहरीको ३२औँ महानिरीक्षक (आईजीपी) मा अतिरिक्त महानिरीक्षक (एआईजी) चन्द्रकुवेर खापुङ नियुक्त भएका छन् । शुक्रबार बालुवाटारमा बसेको मन्त्रिपरिषद् बैठकले वरीयतामा पहिलो रहेका खापुङलाई आईजीपी नियुक्त गर्ने निर्णय गरेको हो ।

हालका आईजीपी दीपक थापा भदौ १८ गते अनिवार्य अवकाशमा जाने भएकाले सरकारले एक साताअघि नै नयाँ नेतृत्व तोकेको हो । नवनियुक्त आईजीपी खापुङले भदौ १९ गतेदेखि कार्यभार सम्हाल्नेछन् । प्रधानमन्त्री केपी शर्मा ओली चीन भ्रमणमा जाँदै भएकाले उनी फर्कनुभन्दा अघि नै आईजीपी नियुक्ति गरिएको हो ।

खापुङ हाल प्रहरीको केन्द्रीय अनुसन्धान ब्युरो (सीआईबी) प्रमुख छन् । उनी प्रहरी नायब महानिरीक्षक (डीआईजी) हुँदा पनि सीआईबीमै कार्यरत थिए । एआईजी भएपछि समेत त्यही पदमा रहँदै आएका उनले यसअघि कोसी प्रदेश प्रहरी प्रमुखको जिम्मेवारी पनि सम्हालेका थिए ।

सन् १९९४ (वि.सं. २०५१) मा प्रहरी निरीक्षक (इन्सपेक्टर) मा प्रतिस्पर्धा गरेर खापुङ प्रहरी सेवामा प्रवेश गरेका हुन् । त्यतिबेला उनीसहितका उम्मेदवारहरू दुई समूह (‘क’ र ‘ख’) मा विभाजन गरिएका थिए । ‘क’ समूहका वसन्तबहादुर कुँवर र दीपक थापा जस्तै उनी पनि त्यही ब्याचका हुन् । तर खापुङ ‘ख’ समूहका ४० जनामध्ये एक थिए, जसलाई विशेष दरबन्दी सिर्जना गरेर २०५२ कात्तिक २७ गते मात्रै प्रहरी निरीक्षकमा नियुक्त गरिएको थियो ।

आईजीपी थापा, एआईजी सुदीप गिरी र टेकबहादुर तामाङ समेत यही भदौ १८ गते अवकाश हुने छन् । त्यसभन्दा तीन दिनअघि खापुङकै ब्याचका एआईजी कृष्णहरि शर्मा पोखरेल पनि अवकाशमा जाने भएकाले सो ब्याचमा खापुङ मात्र बाँकी रहनेछन् ।

खापुङले आगामी कात्तिक २७ गतेसम्म नेपाल प्रहरीको नेतृत्व गर्नेछन् । ३० वर्षे सेवा अवधिको प्रावधान कायम रहे उनले अढाई महिनामै अवकाश लिनुपर्ने व्यवस्था छ ।