सुनौलीबाट दिल्ली जाँदै गरेको बस दुर्घटना, तीनको मृत्यु

काठमान्डु । भारतको उत्तर प्रदेशको बलरामपुरमा एक यात्रुबाहक बस भयानक दुर्घटनामा परेको छ । बसमा आगलागी हुँदा कम्तीमा तीन जनाले ज्यान गुमाएका छन् ।

भारतीय सञ्चारमाध्यमका अनुसार ट्रकले ठक्कर दिएपछि बस नियन्त्रण गुमाउँदै करिब १०० मिटर घिस्रिएको थियो । त्यसपछि बस हाइटेन्सन लाइनको पोलमा ठोक्किँदै गएपछि पोल बसमाथि खस्दा आगलागी फैलिएको बताइएको छ ।

यूपी–२२–एटी–०२४५ नम्बरको सो बस नेपाल–भारत सीमा नाकादेखि (सुनौली) दिल्लीतर्फ गइरहेकी थियो । बसमा रहेका ४५ मध्ये धेरैजसो नेपाली यात्रु भएको प्रारम्भिक विवरण छ ।

दुर्घटनापछि चालक र सहचालकको अवस्थाबारे कुनै जानकारी खुल्न सकेको छैन । घाइतेहरूलाई एम्बुलेन्समार्फत बहराइच मेडिकल कलेज पुर्‍याइएको स्थानीयले बताएका छन् । प्रत्यक्षदर्शीका अनुसार घटनाको समयमा धेरै यात्रु बसबाहिर नै देखिएका थिए, जसले थप ठूलो क्षति हुनबाट बचाएको मानिएको छ ।