नेपाली कम्युनिस्ट पार्टीको निर्वाचन आयोगमा दल दर्ता निवेदन

काठमाडौं । नेपाली कम्युनिस्ट पार्टीले निर्वाचन आयोगमा दल दर्ताको निवेदन पेस गरेको छ । बुधबार भृकुटीमण्डपमा भएको एकता घोषणा सभापछि विभिन्न १० वामपन्थी दल र समूहको संयोजनमा बनेको नयाँ पार्टीले बिहीबार आयोगमा निवेदन दिएको हो ।

साविकका नेकपा (माओवादी केन्द्र), नेकपा (एकीकृत समाजवादी) लगायतका दलहरू मिलेर गठित पार्टीको चुनाव चिन्ह पाँचकुने तारा प्रस्ताव गरिएको छ ।

निर्वाचन आयोगका प्रवक्ता नारायणप्रसाद भट्टराईले नेपाली कम्युनिस्ट पार्टीको दल दर्ता निवेदन प्राप्त भएको पुष्टि गरेका छन् ।

आगामी २१ फागुनमा हुने आमनिर्वाचनमा सहभागी हुन चाहने सबै दलहरूले यही ३० कात्तिकभित्र दल दर्ताको प्रमाणपत्र लिनुपर्ने आयोगको व्यवस्था अनुसार पार्टीले समयमै प्रक्रिया अघि बढाएको हो ।

दलका नेता शिव खकुरेलका अनुसार एकताको प्रतिबद्धतापत्र र घोषणापत्रसहित आयोगमा निवेदन दिइएको छ । उनका भनाइमा, “पार्टीको विधान र पदाधिकारी टुंग्याउने काम भइरहेको छ । ती विवरण पूरा भएपछि आयोगमा औपचारिक रूपमा पेश गरिनेछ ।”