बढी भाडा लिए कारबाही हुने, यात्रुसँग नम्र व्यवहार गर्न व्यवसायीलाई निर्देशन

काठमाडौं । नेपाल यातायात व्यवसायी राष्ट्रिय महासंघले चाडपर्वका बेला यात्रुसँग सरकारले निर्धारण गरेकोभन्दा बढी भाडा नलिन यातायात व्यवसायी तथा चालकलाई निर्देशन दिएको छ ।

महासंघले चाडपर्वमा यात्रुको चाप बढ्ने भन्दै भाडा असुलीमा मनोमानी नगर्न व्यवसायीलाई सचेत गराएको हो । महासचिव डेकनाथ गौतमले तोकिएकोभन्दा बढी भाडा लिने सवारीसाधनमाथि कारबाही हुने स्पष्ट पारे ।

दशैलाई लक्षित गर्दै सरकारले असोज २३ गतेदेखि देशभर यात्रुवाहक सवारीसाधनको अग्रिम टिकट बुकिङ खुला गर्ने निर्णय गरिसकेको छ । यातायात व्यवस्था विभाग, महासंघ, मजदुर संघ–संगठन, प्रहरी प्रधान कार्यालय र उपत्यका ट्राफिक प्रहरी कार्यालयबीचको समन्वयमा यात्रु तथा मालवाहक सवारीको आवागमनलाई व्यवस्थित र सुरक्षित बनाउने तयारी गरिएको हो ।

महासंघले सातै प्रदेश, जिल्ला समिति तथा सदस्य संघ–संस्थालाई चाडपर्वका समयमा यात्रुलाई सहज सेवा उपलब्ध गराउन आवश्यक निर्देशन दिएको जनाएको छ । काठमाडौंको गोङ्गबु बसपार्कमा सञ्चालन हुने अग्रिम टिकट बुकिङ काउन्टरमा खटिने कर्मचारीलाई अनिवार्य रूपमा पोसाक र परिचयपत्र लगाउनसमेत भनिएको छ ।

यात्रुलाई सहज रूपमा टिकट उपलब्ध गराउने, नम्र व्यवहार गर्ने र सुरक्षित यात्राको वातावरण बनाउने विषयलाई महासंघले प्राथमिकतामा राखेको छ ।

ठूला सवारीमा रोक, अत्यावश्यक सामग्रीमा छुट
दशैँको भीड व्यवस्थापनका लागि असोज २५ गते घटस्थापनादेखि कात्तिक ८ गतेसम्म नारायणगढ–काठमाडौं सडकखण्डमा ट्रेलरसहित ठूला सवारीसाधन सञ्चालनमा रोक लगाइने भएको छ । तर खाद्यान्न, औषधि, फलफूललगायत अत्यावश्यक सामग्री बोकेका सवारीसाधन भने सञ्चालन गर्न पाउनेछन् ।

त्यस्तै, घटस्थापनादेखि कात्तिक १० गतेसम्म देशभर यात्रुवाहक सवारीसाधनका लागि लामो तथा मध्यम दूरीका रुट परमिट खुला गरिएको छ । यद्यपि सडकको अवस्था र जोखिमका आधारमा निश्चित आकार तथा प्रकारका सार्वजनिक सवारीसाधनमाथि लगाइएका प्रतिबन्ध भने कायम रहने महासंघले जनाएको छ ।

प्रमुख नाकामा यात्रु सहायता कक्ष
चाडपर्वका समयमा यात्रुलाई आवश्यक सहयोग पुर्‍याउन काठमाडौं उपत्यकाका प्रमुख नाकामा स्थापना गरिएका यात्रु सहायता कक्षलाई प्रभावकारी बनाइने भएको छ । यातायात व्यवस्था विभागले फोकल पर्सनसहितको टोली परिचालन गरी ती कक्षको अनुगमन तथा सहजीकरण गर्नेछ ।

महासंघले गोङ्गबु बसपार्क, कलङ्की, कोटेश्वर, गौशाला र चाबहिल क्षेत्रमा समेत जिम्मेवारी तोकेको छ ।

यसैबीच, दशैँको यात्रालाई सुरक्षित बनाउन सवारीसाधनको प्राविधिक अवस्था परीक्षणलाई पनि प्राथमिकता दिइएको छ । यातायात व्यवस्था विभागको सवारी परीक्षण कार्यालय, टेकुबाट प्राविधिक कर्मचारी खटाएर गोङ्गबु बसपार्कमै सवारीसाधनको निःशुल्क फिटनेस परीक्षण गर्ने व्यवस्था मिलाइने महासंघले जनाएको छ ।