मलेसियामाथि नेपालको सानदार जित, टी–२० सिरिज २–२ को बराबरीमा

काठमाडौं । मलेसियासँगको पाँच खेलको अन्तर्राष्ट्रिय महिला टी–२० शृङ्खलाको चौथो खेलमा नेपालले शानदार प्रदर्शन गर्दै ६ विकेटको जित दर्ता गरेको छ । यो जितसँगै नेपालले सिरिजमा २–२ को बराबरी कायम गरेको छ ।

टस जितेर पहिला ब्याटिङ गरेको मलेसियाले ५ विकेट गुमाउँदै २० ओभरमा १११ रन बनाएको थियो । टोलीका लागि मास एलिसा सर्वाधिक रन बनाउने खेलाडी भइन् । उनले ६३ बल खेल्दै ५६ रनको योगदान दिइन् ।

नेपालका लागि कविता कुँवरले उत्कृष्ट बलिङ गर्दै १० रन मात्र खर्चेर ३ विकेट लिइन् । त्यस्तै, पूजा महतो र कविता जोशीले एक–एक विकेट हात पारे ।

११२ रनको लक्ष्य पछ्याउने क्रममा नेपालले १७ ओभर ३ बलमा ४ विकेटको क्षतिमा ११५ रन बनाउँदै सहज जित हात पार्‍यो । कप्तान इन्दु बर्माले नटआउट ४८ रनको महत्वपूर्ण योगदान दिइन् भने रुबिना क्षेत्रीले २३ रन बनाएर कप्तानसँग सशक्त साझेदारी गर्दै जित सुनिश्चित गरिन् ।

मलेसियाका लागि आइन्ना हामीजाह, नूर दानियाँ र माहिराले एक–एक विकेट लिएका थिए ।

यसअघि, पहिलो खेलमा नेपाल ३ रनले पराजित भएको थियो भने दोस्रो खेलमा ६ विकेटले जितेको थियो । तेस्रो खेलमा नेपाल १३ रनले पराजित भए पनि चौथो खेलमा शानदार पुनरागमन गर्दै श्रृङ्खला बराबरीमा ल्याएको हो ।

अब पाँचौं तथा निर्णायक खेल बुधबार हुनेछ, जसले श्रृङ्खलाको विजेता तय गर्नेछ ।