गाजामा राहतका क्रममा मृत्यु : भोक र भीडको बिच त्रासदी

गाजा । दक्षिणी गाजाको रफाहामा खाद्यान्न वितरणको क्रममा भएको भीडमा कम्तीमा तीन जनाले ज्यान गुमाएका छन् । इजरायली नाकाबन्दीका कारण तीन महिनासम्म रोकिएको राहत वितरण पछिल्लो पटक फेरि सुरु गरिएको हो ।

मंगलबारको चर्को घाममा राहत लिन जम्मा भएका हजारौँ मानिस एक आपसमा धकेलाधकेलमा परेका थिए । गाजा ह्युम्यानिटेरियन फाउन्डेसन (जिएचएफ) ले राहत सामग्री वितरण गरिरहेको थियो । त्यही भीडमा बालबालिका र महिलाको विवशता झल्काउने हृदयविदारक दृश्य देखिएको थियो ।

स्थानीय अधिकारीहरूका अनुसार, राहत लिन पुगेका धेरैजना अझै सम्पर्कविहीन छन् । इजरायली सुरक्षाबलले वितरण केन्द्र वरपर कडा सुरक्षा घेरा लगाएका थिए, जसले थप तनावपूर्ण वातावरण सिर्जना गर्‍यो । सुरक्षाबलले परिस्थितिलाई नियन्त्रणमा राख्न गोली चलाउनु परेको दाबी गरेका छन्, तर प्रत्यक्षदर्शीहरूले गोली पड्काउँदा भीड अझ भयभीत भएको बताएका छन् ।

जिएचएफले भने राहत वितरणलाई निरन्तरता दिने जनाएको छ । करिब २० लाख गाजाबासी भोकसँग जुधिरहेका बेला वितरण थालिएको हो । तर, स्थायी वितरण केन्द्र बिना गरिएको यस किसिमको कार्यले जनताको पीडामा मलम होइन, थप पीडा थपेको देखिन्छ ।

संयुक्त राष्ट्रसंघका प्रवक्ता स्टेफन डुजारिकले गाजामा देखिएको मानवीय अवस्था अत्यन्त दुःखद रहेको बताएका छन् । उनका अनुसार, वितरण प्रक्रियाको व्यवस्थापन अभावले संकट झनै भयावह बनाएको छ ।

राफाहाको दृश्य अहिले गाजामा भइरहेको युद्ध र मानवीय संकटको ताजा चित्र बनेको छ — जहाँ भोक, गोली, र भीड एकैचोटि जनताको नियति बनेका छन् ।