सुनकोसी नदीमा डुबेर दुई विद्यार्थीको ज्यान गयो

सिन्धुली । सुनकोसी नदीमा पौडी खेल्ने क्रममा डुबेर दुई बालकको ज्यान गएको छ । आइतबार दिउँसो सुनकोसी गाउँपालिका–५ अन्तर्गत सित्खा पुल नजिक भएको घटनामा दुई विद्यार्थीको मृत्यु भएको प्रहरीले जनाएको छ ।

जिल्ला प्रहरी कार्यालय सिन्धुलीका अनुसार मृत्यु हुनेमा सुनकोसी गाउँपालिका–४ का नौ वर्षीय सफल पुलामी र वडा नं–५ का १० वर्षीय उकेश विक रहेका छन् । उनीहरू साथीहरूसँग नदीमा पौडी खेल्न गएका बेला अचानक डुबेका थिए ।

स्थानीयका अनुसार दुवै बालक स्थानीय प्रगतिशील माध्यमिक विद्यालयमा अध्ययनरत विद्यार्थी हुन् । घटनापछि गाउँभर शोकको वातावरण बनेको छ ।

घटनाबारे सूचना प्राप्त हुनासाथ नेपाल प्रहरीको इलाका प्रहरी कार्यालय खुर्कोट, प्रहरी चौकी रातामाटा तथा सशस्त्र प्रहरी बल नेपालको गोताखोर टोली खोजी तथा उद्धारमा खटिएको थियो । स्थानीयवासी र जनप्रतिनिधिहरू पनि खोजी अभियानमा सहभागी भएका थिए ।

प्रहरीका अनुसार खोजीका क्रममा दुवै बालकको शव सुनकोसी नदी किनारमा फेला परेको हो ।