काठमाडौं–ललितपुर प्रहरी नेतृत्व फेरियो, ३३ एसएसपीको एकैपटक सरुवा

काठमाडौं । सरकारले नेपाल प्रहरीका ३३ जना वरिष्ठ प्रहरी उपरीक्षक (एसएसपी) को एकैपटक सरुवा गरेको छ । गृहमन्त्रालयको जिम्मेवारीसमेत सम्हालिरहेका प्रधानमन्त्री बालेन्द्र शाहको निर्णयअनुसार सोमबार सरुवाको सूची सार्वजनिक गरिएको हो ।

सरुवासँगै काठमाडौं र ललितपुरका प्रहरी प्रमुख परिवर्तन भएका छन् । काठमाडौं प्रहरी परिसरको नेतृत्व अब एसएसपी दिलिप घिमिरेले सम्हाल्ने भएका छन् भने ललितपुर प्रहरी परिसरको प्रमुखमा एसएसपी तुलबहादुर कार्की नियुक्त भएका छन् । घिमिरे यसअघि मानवस्रोत विकास विभागमा कार्यरत थिए भने कार्की गण्डकी प्रदेश प्रहरी कार्यालयमा कार्यरत थिए ।

काठमाडौं प्रहरी प्रमुख रहेका एसएसपी रमेश थापा मधेस प्रदेश प्रहरी कार्यालयमा सरुवा भएका छन् । यद्यपि उनलाई काजमा प्रहरी प्रधान कार्यालयअन्तर्गत अन्वेषण योजना तथा विकास निर्देशनालयको जिम्मेवारी दिइएको छ । ललितपुर प्रहरी प्रमुख होबिन्द्र बोगटी भने प्रहरी प्रधान कार्यालयस्थित राजमार्ग सुरक्षा तथा ट्राफिक व्यवस्थापन महाशाखामा सरुवा भएका छन् ।

सरुवासँगै काठमाडौं उपत्यका ट्राफिक प्रहरी कार्यालयको नेतृत्व पनि परिवर्तन भएको छ । ट्राफिक प्रहरी प्रमुखको जिम्मेवारी एसएसपी शान्तिराज कोइरालाले पाएका छन् । यसअघिका प्रमुख नवराज अधिकारीलाई साइबर ब्युरो, भोटाहिटीमा खटाइएको छ ।

लागुऔषध नियन्त्रण ब्युरो, कोटेश्वरको प्रमुखमा एसएसपी सुवासचन्द्र बोहरालाई पठाइएको छ । कार्य विभागमा कार्यरत बोहराले अब ब्युरोको नेतृत्व सम्हाल्नेछन् । यसअघिका प्रमुख कृष्णप्रसाद कोइराला भने गण्डकी प्रदेश प्रहरी कार्यालयमा सरुवा भएका छन् ।

मानव बेचबिखन अनुसन्धान ब्युरो, बबरमहलको प्रमुखमा एसएसपी नकुल पोखरेललाई जिम्मेवारी दिइएको छ । उनी यसअघि अन्तर्राष्ट्रिय प्रहरी समन्वय महाशाखामा कार्यरत थिए ।

केन्द्रीय अनुसन्धान ब्युरो (सीआईबी) का प्रमुख एसएसपी शिवकुमार श्रेष्ठलाई कोसी प्रदेश प्रहरी तालिम केन्द्रमा सरुवा गरिएको छ । उनको स्थानमा युक्ति तालिम महाविद्यालय, जर्गाह पश्चिम नवलपरासीमा कार्यरत एसएसपी अनुपशमशेर जबरा ल्याइएका छन् । जबराको स्थानमा साइबर ब्युरोका एसएसपी अजय केसीलाई पठाइएको छ ।

यस्तै, एसएसपी दयानिधि ज्ञवालीलाई लुम्बिनी प्रदेश प्रहरी तालिम केन्द्र, बुटवलमा सरुवा गरिएको छ ।

सरकारले गरेको यो व्यापक सरुवाले प्रहरी संगठनका विभिन्न महत्वपूर्ण कार्यालय र इकाइहरूको नेतृत्वमा उल्लेखनीय फेरबदल आएको छ ।