संसदमा श्रम संस्कृति पार्टीले आज पनि गर्यो प्लेकार्डसहित विरोध

काठमाडौं । श्रम संस्कृति पार्टीले प्रतिनिधिसभा बैठकमा आज पनि विरोध प्रदर्शनलाई निरन्तरता दिएको छ । पार्टीका अध्यक्ष हर्कराज राई (हर्क साम्पाङ) सहितका सांसदहरूले बैठक सुरु हुनासाथ प्लेकार्ड प्रदर्शन गर्दै आफ्ना मागप्रति सरकारको ध्यानाकर्षण गराएका हुन् ।

बैठक प्रारम्भ भएलगत्तै श्रम संस्कृति पार्टीका सांसदहरू आ–आफ्नो स्थानबाट उठेर विरोधमा उत्रिएका थिए । उनीहरूले संसद र सरकार जनउत्तरदायी बन्नुपर्ने तथा जनताका आवाजलाई बेवास्ता गर्न नहुने सन्देश लेखिएका प्लेकार्ड प्रदर्शन गरेका थिए ।

विरोध जारी रहँदा सभामुखले सांसदहरूको ध्यानाकर्षण भएको उल्लेख गरेपछि श्रम संस्कृति पार्टीका सांसदहरू आफ्ना स्थानमा बसेका थिए । त्यसपछि प्रतिनिधिसभाको बैठक नियमित कार्यसूचीअनुसार अघि बढाइएको थियो ।

यसअघि सोमबार बसेको बैठकमा पनि श्रम संस्कृति पार्टीले प्लेकार्डसहित विरोध जनाएको थियो । लगातार दोस्रो दिनको प्रदर्शनले संसदभित्र राजनीतिक दबाब बढाएको देखिएको छ ।

पार्टीले विशेषगरी बालेन शाह संसदप्रति उत्तरदायी हुनुपर्ने माग उठाउँदै आएको छ । जनप्रतिनिधि र राज्य संयन्त्रबीच प्रत्यक्ष जवाफदेहिताको अभ्यास हुनुपर्ने भन्दै श्रम संस्कृति पार्टीले संसदभित्र आफ्नो विरोधलाई जारी राखेको जनाएको छ ।