सरकारी कर्मचारीको तलब अब महिनामा दुई किस्तामा दिने तयारी

काठमाडौं । सरकारले सरकारी कर्मचारीलाई दिइने तलबभत्ता अब महिनामा दुई पटक वितरण गर्ने व्यवस्था लागू गर्ने तयारी गरेको छ । हालसम्म मासिक रूपमा एकमुष्ट रूपमा उपलब्ध गराइँदै आएको तलब अब अर्धमासिक रूपमा भुक्तानी गरिनेछ ।

अर्थ मन्त्रालयको बजेट तथा कार्यक्रम महाशाखाले महालेखा नियन्त्रक कार्यालयलाई पत्र पठाउँदै नयाँ प्रणाली कार्यान्वयनका लागि आवश्यक तयारी गर्न निर्देशन दिएको छ । मन्त्रालयका अनुसार मन्त्रीस्तरबाटै अर्धमासिक तलब वितरण गर्ने निर्णय भइसकेको छ ।

यो नयाँ व्यवस्थापछि कर्मचारीहरूले महिनामा दुईपटक तलब पाउनेछन्, जसले उनीहरूको नगद प्रवाह व्यवस्थापनलाई सहज बनाउने अपेक्षा गरिएको छ ।

अर्थ मन्त्रालयले तलब वितरण प्रणाली अझ व्यवस्थित, पारदर्शी र समयमै हुने विश्वास व्यक्त गरेको छ । साथै, सम्बन्धित निकायहरूलाई आवश्यक प्राविधिक तथा प्रशासनिक तयारी चाँडो पूरा गर्न आग्रह गरिएको छ ।