रास्वपाको केन्द्रीय समिति बैठक बस्दै, स्थानीय निर्वाचनको तयारी मुख्य एजेन्डा

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ । पार्टी सभापति रवि लामिछानेको निर्देशनमा महामन्त्री विपीनकुमार आचार्यले बिहान ११ बजे वनस्थलीस्थित केन्द्रीय कार्यालय घन्टीघरमा बैठक बोलाएका हुन् ।

आगामी स्थानीय तह निर्वाचनको तयारी तथा पार्टीको आन्तरिक सङ्गठनलाई थप मजबुत बनाउने विषयलाई बैठकले प्राथमिकतामा राखेको छ । बैठकको प्रमुख कार्यसूचीमा स्थानीय निर्वाचनका लागि ‘उम्मेदवार छनोट रूपरेखा–२०८३’ अनुमोदन गर्ने विषय रहेको छ ।

निर्वाचनमा उम्मेदवार चयन गर्दा अपनाउने विधि र प्रक्रियालाई अन्तिम रूप दिने तयारी रास्वपाले गरेको छ । साथै, जनप्रतिनिधिलाई फिर्ता बोलाउन सकिने ‘राइट टु रिकल’ व्यवस्थासम्बन्धी दस्तावेज तयार गर्ने विषयमा पनि बैठकमा छलफल हुने भएको छ । यसका लागि आवश्यक कानुनी तथा राजनीतिक खाका निर्माण गर्ने पार्टीको योजना छ ।

बैठकले पार्टीभित्र रिक्त रहेका तथा थप गर्नुपर्ने विभिन्न पदमा मनोनयनसम्बन्धी निर्णयसमेत गर्नेछ । केन्द्रीय समिति सदस्य तथा पदाधिकारी, सचिवालय सदस्य र विभिन्न विभागीय प्रमुखको जिम्मेवारी बाँडफाँट गर्ने कार्यसूची रहेको छ ।

त्यस्तै, स्थानीय निर्वाचनका लागि केन्द्रीय उम्मेदवार छनोट समिति गठन गरी सदस्य मनोनयन गर्ने विषय पनि बैठकमा प्रस्तुत हुनेछ ।

स्थानीय तहमा उम्मेदवार छनोटको प्रक्रिया र विधिबारे कार्यकर्तालाई जानकारी गराउन केन्द्रीय सदस्य तथा सांसदको नेतृत्वमा देशव्यापी प्रशिक्षण र अभिमुखीकरण सञ्चालन गर्ने प्रस्तावसमेत बैठकमा छलफल हुने बताइएको छ ।