आज नवनिर्वाचित प्रतिनिधिसभा सदस्यहरूको शपथ, सबै तयारी पूरा

काठमाडौं । नवनिर्वाचित प्रतिनिधिसभा सदस्यहरूको पद तथा गोपनीयताको शपथ आज बिहीबार अपराह्न २ः०० बजे हुने भएको छ । संघीय संसद् सचिवालयले शपथ कार्यक्रमका लागि सम्पूर्ण तयारी पूरा भएको जनाएको छ ।

सचिवालयका प्रवक्ता एकराम गिरीका अनुसार प्रतिनिधिसभाका ज्येष्ठ सदस्य अर्जुननरसिंह केसीले नवनिर्वाचित सांसदहरूलाई शपथ गराउनेछन् । यसअघि राष्ट्रपति रामचन्द्र पौडेलले बुधबार केसीलाई पद तथा गोपनीयताको शपथ गराइसकेका छन् ।

शपथ समारोह सिंहदरबारस्थित नवनिर्मित बहुउद्देश्यीय हलमा आयोजना हुनेछ । सचिवालयका अनुसार केही सांसदहरूले नेपालीबाहेक अन्य भाषामा पनि शपथ लिने तयारी गरेका छन्, जसमा उल्लेख्य संख्यामा मैथिली भाषा प्रयोग गरिनेछ ।

संविधानको धारा ९९ र धारा ९१ को उपधारा ५ तथा प्रतिनिधिसभा सदस्य निर्वाचन ऐन, २०७४ को दफा ७५ अनुसार सांसदहरूले पद तथा गोपनीयताको शपथ लिनुपर्ने व्यवस्था रहेको छ ।

शपथ कार्यक्रममा सहभागी हुन सांसदहरूलाई आवश्यक कागजातसहित निर्धारित समयभन्दा अगावै उपस्थित हुन आग्रह गरिएको छ । साथै, उनीहरूलाई औपचारिक वा सांस्कृतिक पहिचान झल्किने पोसाकमा उपस्थित हुन पनि अनुरोध गरिएको छ ।

कार्यक्रम स्थलमा बसाइँ व्यवस्था, सभामुखको आसन, रोष्ट्रम तथा सचिवालयका पदाधिकारीहरूका लागि आवश्यक संरचना तयारी अवस्थामा राखिएको छ ।

गएको फागुन २१ गते सम्पन्न प्रतिनिधिसभा सदस्यको निर्वाचनमा राष्ट्रिय स्वतन्त्र पार्टीले १८२, नेपाली कांग्रेसले ३८, नेकपा (एमाले)ले २५, नेपाली कम्युनिस्ट पार्टीले १७, श्रम संस्कृति पार्टीेले सात र राष्ट्रिय प्रजातन्त्र पार्टीले पाँच सिट प्राप्त गरेका छन् ।