प्रतिनिधिसभामा प्रतिनिधित्व गर्ने दलहरूको बैठक आज, आगामी प्रक्रियाबारे छलफल हुने

काठमाडौं । संघीय संसद् सचिवालयले प्रतिनिधिसभामा प्रतिनिधित्व गर्ने राजनीतिक दलहरूको बैठक आह्वान गरेको छ । बैठक आज दिउँसो २ बजेका लागि बैठक बोलाइएको छ ।

महासचिव पद्मप्रसाद पाण्डेका अनुसार बैठक सिंहदरबारस्थित संसद् सचिवालयमा रहेको महासचिवको कार्यकक्षमा बस्नेछ । प्रतिनिधिसभाको निर्वाचनबाट प्रतिनिधित्व गर्न सफल भएका दलहरूबीच आगामी संसदीय प्रक्रिया र कार्यसूचीबारे प्रारम्भिक छलफल गर्ने उद्देश्यले बैठक आह्वान गरिएको हो ।

फागुन २१ गते सम्पन्न प्रतिनिधिसभा निर्वाचनबाट ६ वटा राजनीतिक दलले प्रतिनिधित्व सुनिश्चित गरेका छन् । प्रतिनिधिसभामा राष्ट्रिय स्वतन्त्र पार्टी, नेपाली कांग्रेस, नेकपा एमाले, नेपाली कम्युनिष्ट पार्टी, श्रम संस्कृति पार्टी र राष्ट्रिय प्रजातन्त्र पार्टीले सिट जितेका छन् ।

सचिवालयले यी दलहरूसँग समन्वय गर्दै संसद्को बैठक सञ्चालन, कार्यसूची निर्धारण तथा अन्य आवश्यक प्रक्रियाबारे सहमति जुटाउने तयारी गरेको जनाएको छ ।