प्रत्यक्षतर्फका मतपत्र छपाइ सुरु, १५ दिनभित्र सकिने

काठमाडौं । आगामी फागुन २१ गते हुने प्रतिनिधिसभा निर्वाचनका लागि प्रत्यक्षतर्फका मतपत्र छपाइ औपचारिक रूपमा सुरु भएको छ । निर्वाचन आयोगका प्रमुख निर्वाचन आयुक्त रामप्रसाद भण्डारीसहितका अधिकारीहरूले सोमबार भक्तपुरको सानोठिमीस्थित जनक शिक्षा सामग्री केन्द्र लिमिटेड पुगेर छपाइ प्रक्रियाको निरीक्षण गरेका हुन् ।

निरीक्षणपछि प्रमुख आयुक्त भण्डारीले प्रत्यक्षतर्फ कुल २ करोड ३ लाख २३ हजार मतपत्र छाप्ने काम सुरु गरिएको जानकारी दिए । उनका अनुसार यो प्रक्रिया करिब १५ दिनभित्र सम्पन्न गर्ने लक्ष्य लिइएको छ ।

भण्डारीले समानुपातिकतर्फका लागि २ करोड ८ लाख ५० हजार मतपत्रको छपाइ यसअघि नै सकिएको पनि स्पष्ट पारे । आयोगले आगामी फागुन ५ गतेभित्र देशभरका सबै निर्वाचन क्षेत्रमा मतपत्र पठाइसक्ने तयारी गरेको जनाएको छ ।

उनका अनुसार मतदानअघि मतपत्रको सुरक्षासहित निर्वाचनका सबै प्राविधिक र व्यवस्थापकीय तयारी पूरा गरिएको छ । यसअघि जनक शिक्षा सामग्री केन्द्रले प्रत्यक्षतर्फ करिब ११ लाख नमूना मतपत्र छापेर निर्वाचन आयोगलाई बुझाइसकेको थियो ।