फागुन २१ कै निर्वाचनमा दलहरूको जोड, समय सरे प्रतिनिधिसभा पुनर्स्थापनाको चेतावनी

काठमान्डु । तोकिएको फागुन २१ गतेकै मितिमा प्रतिनिधिसभा निर्वाचन हुनुपर्नेमा अधिकांश राजनीतिक दलहरू एकमत देखिएका छन् । सोमबार प्रधानमन्त्री कार्यालय सिंहदरबारमा आयोजित सर्वदलीय छलफलमा सहभागी नेताहरूले सरकार, निर्वाचन आयोग र सबै दलहरू मिलेर निर्धारित समयमै चुनाव सम्पन्न गर्नुपर्नेमा जोड दिएका हुन् ।

नेताहरूले स्वतन्त्र, निष्पक्ष र भयरहित वातावरण निर्माण गर्न सरकारले अझ प्रभावकारी भूमिका खेल्नुपर्ने बताएका छन् । छलफलका क्रममा केही दलका नेताहरूले सरकार स्वयं निर्वाचन मिति सार्ने तयारीमा त छैन भन्ने शंका व्यक्त गर्दै यदि फागुन २१ मा निर्वाचन नभए प्रतिनिधिसभा पुनर्स्थापनाबाहेक अर्को विकल्प नहुने चेतावनी दिए ।

नेकपाको चेतावनीः मिति पर धकेल्यो भने अस्वीकार्य
नेपाली कम्युनिस्ट पार्टीका नेता वर्षमान पुनले सरकारले घोषित मितिमै निर्वाचन गराउने प्रतिबद्धता जनाउनु सकारात्मक भएको बताए । तर संविधानविपरीत निर्वाचन सार्ने प्रयास भए स्वीकार्य नहुने उनको चेतावनी छ । पूर्वअर्थमन्त्री पुनले ६ महिनाभित्र नयाँ संसद् नआए या त सडकले निर्णय गर्ने या पुरानै संसद् पुनःस्थापना हुने अवस्था आउने उल्लेख गरे ।

“खेल सुरु भइसकेपछि नियम फेरिनु हुँदैन,” पुनले भने, “बीचमै कानुन बदलियो भने त्यसले द्वन्द्व निम्त्याउन सक्छ ।”

जनमोर्चा र जनमतको असन्तुष्टि
राष्ट्रिय जनमोर्चाका नेता मनोज भट्टले फागुन २१ को निर्वाचन अत्यन्त महत्वपूर्ण रहेको भन्दै चुनाव नै ‘कोर्स करेक्सन’ को सही बाटो भएको बताए । यद्यपि उनले वर्तमान सरकार असंवैधानिक ढंगले बनेको टिप्पणी गरे ।

जनमत पार्टीका उपाध्यक्ष बसन्त कुशवाहले भने निर्वाचन आयोग र सरकार स्वयं चुनावप्रति विश्वस्त नदेखिएको आरोप लगाए । निष्क्रिय अध्यादेशको आडमा पार्टी विभाजन गरिएको भन्दै त्यसमा संलग्न व्यक्तिहरूमाथि कारबाही नभएसम्म निर्वाचनप्रति विश्वास गर्न नसकिने उनको भनाइ छ ।

राप्रपा र एमालेको धारणा
राप्रपाका नेता राजेन्द्र गुरुङले राजनीतिक दल, सरकार र जेन–जीबीच नवीन सहमति गरेर मात्र मुलुकलाई निकास दिन सकिने बताए । निषेधको राजनीति त्यागेर समझदारीको बाटो अपनाउन उनले आग्रह गरे ।

नेकपा एमालेका सचिव महेश बस्नेतले सैद्धान्तिक रूपमा निर्वाचनको पक्षमा भए पनि सरकारका गतिविधिले चुनाव हुनेमा विश्वस्त हुन नसकेको बताए । उनले प्रधानमन्त्रीले प्रमुख दलका शीर्ष नेतासँग प्रत्यक्ष छलफल गर्नुपर्ने सुझाव दिए ।

कांग्रेसको आग्र: वातावरण निर्माण सरकारको जिम्मा
नेपाली कांग्रेसका सहमहामन्त्री महेन्द्र यादवले निर्वाचन सम्पन्न हुने वातावरण बनाउन प्रधानमन्त्रीले प्रमुख दलका शीर्ष नेतासँग संवाद गर्नुपर्ने बताए । सुरक्षा प्रत्याभूति र भयरहित वातावरण निर्माणमा सरकार कमजोर देखिएको उनको आरोप छ ।

“निर्वाचन समयमै भएन भने प्रधानमन्त्री कार्की र राष्ट्रपति रामचन्द्र पौडेलको लिगेसीसँग यो विषय जोडिन्छ,” यादवले चेतावनी दिए ।

सर्वदलीय छलफलमा समग्रमा एउटा साझा सन्देश देखिएको छ— फागुन २१ कै मितिमा निर्वाचन हुनैपर्छ, अन्यथा राजनीतिक संकट थप गहिरिनेछ ।