कोशी सरकार सञ्चालनका लागि सत्तारुढ दलको न्यूनतम साझा कार्यक्रम

काठमाडौं । कोशी प्रदेश सरकार सञ्चालनका लागि सत्तारूढ नेपाल कम्युनिष्ट पार्टी (एमाले) र नेपाल कम्युनिष्ट पार्टी (नेकपा) ले न्यूनतम साझा कार्यक्रम तयार गरेका छन् । सरकार गठनका क्रममा दुई दलबीच भएको सहमतिअनुसार साझा कार्यक्रम निर्माण गरिएको हो ।

कार्यक्रम तयार गर्न गठित कार्यदलले विभिन्न विषयमा सहमति जुटाउँदै सरकारका आगामी नीति, प्राथमिकता र प्रतिबद्धता समेटिएको प्रतिवेदन मुख्यमन्त्री हिक्मतकुमार कार्कीलाई बुझाएको छ ।

कार्यदलमा नेकपा संसदीय दलका नेता इन्द्रबहादुर आङ्बो, एमाले संसदीय दलका उपनेता तिलकुमार मेन्याङ्बो, मन्त्री तिलचन पाठक, सांसदहरू बाबुराम गौतम, गणेश उप्रेती र रेवतीरमण भण्डारी तथा एमाले प्रदेश कमिटी सचिव राजकुमार भण्डारी सहभागी थिए ।

साझा कार्यक्रममा मुख्यमन्त्री तथा मन्त्रिपरिषद्को कार्यालयलाई प्रदेशका सबै मन्त्रालय तथा निकायको कामको अनुगमन गर्न सक्ने प्रविधिमैत्री केन्द्रका रूपमा विकास गर्ने योजना समेटिएको छ । अन्तरमन्त्रालय समन्वयलाई कानुनी आधारमा थप प्रभावकारी बनाउने तथा २०८० सालअघि बनेका ऐन–नियमको समीक्षा गरी चालु आर्थिक वर्षभित्र आवश्यक परिमार्जन र एकीकरण गर्ने लक्ष्य पनि राखिएको छ ।

स्वास्थ्य क्षेत्र सुधारलाई पनि साझा कार्यक्रममा विशेष प्राथमिकता दिइएको छ । प्रदेशका प्रत्येक जिल्लामा रहेका प्रादेशिक अस्पताललाई कम्तीमा ५० शय्याको बनाउने लक्ष्यसहित पहिलो त्रैमासिकभित्रै संगठन तथा व्यवस्थापन (ओएण्डएम) सर्वेक्षण पूरा गर्ने योजना अघि सारिएको छ ।

धनकुटा प्रादेशिक अस्पताललाई शिक्षण अस्पतालका रूपमा विकास गर्ने तथा मेची प्रादेशिक अस्पताललाई स्वास्थ्य विज्ञान प्रतिष्ठानका रूपमा अघि बढाउने प्रक्रिया तत्काल सुरु गर्ने कार्यक्रम पनि समेटिएको छ ।

अस्पतालमा स्वास्थ्य सेवा थप प्रभावकारी बनाउन आइतबारको सार्वजनिक बिदामा समेत अतिरिक्त सुविधा उपलब्ध गराएर कर्मचारी परिचालन गर्ने व्यवस्था मिलाउने योजना छ । यसबाहेक प्रदेशमा विशिष्टीकृत जलन उपचार युनिट स्थापना गर्ने विषयलाई पनि न्यूनतम साझा कार्यक्रमको प्राथमिकतामा राखिएको छ ।

हेर्नुहोस् पूर्णपाठ: