देशभर मनसुनी प्रभाव सक्रिय, केही स्थानमा भारी वर्षाको सम्भावना

काठमाडौं । हाल मनसुनको न्यून चापीय रेखा सरदर स्थानको आसपासमा अवस्थित रहेकाले देशका विभिन्न भागमा वर्षा र बदलीको प्रभाव देखिएको छ । मौसम पूर्वानुमान महाशाखाका अनुसार कोशी, मधेस, बागमती प्रदेशलगायत पहाडी भूभागमा सामान्यतया बदली रही बाँकी स्थानहरूमा आंशिक बदली देखिएको छ ।

हालको अवस्था
बागमती र गण्डकी प्रदेशका पहाडी भूभागका केही स्थानहरूमा तथा कोशी, मधेस र लुम्बिनी प्रदेशका एक–दुई स्थानमा हल्कादेखि मध्यम वर्षा भइरहेको छ ।

दिउँसोको मौसम पूर्वानुमान
आज दिउँसो बागमती, गण्डकी, लुम्बिनी र सुदूरपश्चिम प्रदेशका पहाडी भूभागमा सामान्य बदली रहनेछ। ती क्षेत्रका केही स्थानहरूमा तथा अन्य भागका थोरै स्थानहरूमा मध्यम वर्षाको सम्भावना छ । साथै, लुम्बिनी प्रदेशको तराई तथा सुदूरपश्चिम र कर्णाली प्रदेशको पहाडी क्षेत्रका एक–दुई स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ ।

रातिको मौसम पूर्वानुमान
आज राति देशभर सामान्यतया बदली रहनेछ। पहाडी भूभागका धेरै स्थानहरू र अन्य क्षेत्रका थोरै स्थानहरूमा मध्यम वर्षा हुन सक्नेछ । गण्डकी, कर्णाली र सुदूरपश्चिम प्रदेशको पहाडी भूभाग, साथै लुम्बिनी र कोशी प्रदेशको तराई भागका एक–दुई स्थानमा भारी वर्षा हुने सम्भावना रहेको छ ।

सावधानी अपनाउन आग्रह
कोशी, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा भारी वर्षा हुन सक्ने पूर्वानुमानसहित महाशाखाले आवश्यक सतर्कता अपनाउन नागरिकहरूलाई आग्रह गरेको छ ।

बाढी, पहिरो तथा जलस्रोतजन्य जोखिमबाट सचेत रहनु सुझाव दिइएको छ ।