मुख्यमन्त्री यादवले विश्वासको मत लिन बैठक आह्वान

जनकपुर । मधेस प्रदेशसभाको बैठक आज बिहान बस्ने भएको छ । मुख्यमन्त्री सरोज कुमार यादवले विश्वासको मत लिने उद्देश्यले बिहान साढे ८ बजे बैठक आह्वान गरिएको हो ।

सर्वोच्च अदालतले सोमबार साँझ मुख्यमन्त्री यादवलाई २४ घण्टाभित्र विश्वासको मत लिन परमादेश जारी गरेपछि उनले आजको बैठकमार्फत मतको विश्वास लिन लागेका हुन् ।

प्रदेशसभामा कूल १०७ सदस्य छन्, जसमा सरकार बन्न कम्तीमा ५४ मत आवश्यक पर्छ । एमालेसँग २५ सांसद भए पनि तीमध्ये एक जना निलम्बित छन् । नेपाल संघीय समाजवादी पार्टी र राप्रपाका एक–एक सांसद एमाले पक्षमा उभिने देखिए पनि राप्रपाले आफ्ना मन्त्री कञ्चन बिच्छामाथि कारबाही प्रक्रिया अघि बढाइसकेको छ ।

यसअघि एमालेले सबैभन्दा ठूलो दलको हैसियतमा, प्रदेश प्रमुख र सभामुखको सहयोगका आधारमा संविधानको धारा १६८(३) अनुसार सरकार गठन गरेको थियो । तर सो प्रक्रिया असंवैधानिक भएको आरोप लगाउँदै सातदलीय गठबन्धन सर्वोच्च अदालत पुगेको थियो ।