भदौरेमा वृद्ध दम्पतीको निर्मम हत्या, एक महिनामै दोस्रो भयावह घटना

ओखलढुंगा । जिल्लाको चिशंखुगढी गाउँपालिका–६ भदौरेमा फेरि एक वृद्ध दम्पतीको विभत्स हत्या भएको छ । भदौरेस्थित बोहोरे टोलमा ८० वर्षीय चन्द्र विक्रम राई र उनकी श्रीमती चन्द्रमाया राईको शव आफ्नै पसलभित्र हत्या गरिएको अवस्थामा फेला परेको हो ।

स्थानीयका अनुसार दम्पतीले सञ्चालन गर्दै आएको सानो किराना पसलमा लुटपाटपछि उनीहरूको हत्या गरिएको प्रारम्भिक अनुमान गरिएको छ । घटनाको सूचना पाएलगत्तै स्थानीय प्रहरी घटनास्थलमा पुगेको छ भने क्षेत्रको सुरक्षा व्यवस्था कडा पारिएको छ ।

वडा अध्यक्ष बलराम कटवालले प्रारम्भिक अनुसन्धानबाट लुटपाटकै उद्देश्यले हत्या भएको हुनसक्ने संकेत देखिएको बताए । “घटना अत्यन्तै दुःखद र निन्दनीय छ, स्थानीयवासी निकै त्रसित छन्,” उनले भने ।

जिल्ला प्रहरी कार्यालय ओखलढुंगाका प्रमुख प्रहरी नायव उपरीक्षक मदन केसीले आफू नेतृत्वको प्रहरी टोली घटनास्थलतर्फ प्रस्थान गरिसकेको जानकारी दिए । उनका अनुसार घटनाको सूक्ष्म अनुसन्धान सुरु गरिएको छ र दोषी पहिचानका लागि सबै पक्षबाट खोजी भइरहेको छ ।

यसअघि करिब एक महिनाअघि पनि यही चिशंखुगढी गाउँपालिका–६ भदौरेमै ६० वर्षीय शोभितमान थापामगर र उनकी श्रीमती रत्नमाया थापामगरको हत्या भएको थियो । उक्त घटनामा संलग्न रहेको आरोपमा चार जना पक्राउ परेर अनुसन्धान भइरहेको अवस्थामा पुनः अर्को दोहोरो हत्याको घटना सार्वजनिक भएपछि स्थानीयमा भय र आक्रोश बढेको छ ।

लगातार भएका हत्या घटनाले भदौरे क्षेत्रमा गम्भीर सुरक्षा चुनौती थपिएको भन्दै स्थानीयवासीले प्रहरी प्रशासनसँग दोषीलाई छिटोभन्दा छिटो पक्राउ गरी कडा कारबाही गर्न माग गरेका छन् । घटनासम्बन्धी थप विवरण आउन बाँकी रहेको प्रहरीले जनाएको छ ।