जनार्दन शर्मा माओवादीबाट अलग, ‘प्रगतिशील अभियान नेपाल’को घोषणा

काठमाडौं । नेकपा (माओवादी केन्द्र) का नेता जनार्दन शर्माले पार्टी परित्याग गरी नयाँ राजनीतिक अभियान ‘प्रगतिशील अभियान नेपाल’को घोषणा गरेका छन् । मंगलबार आयोजित पत्रकार सम्मेलनमार्फत उनले यो नयाँ अभियान सार्वजनिक गरेका हुन् ।

शर्मासँगै माओवादीका वरिष्ठ नेता राम कार्की र अञ्जना विसंखे पनि अभियानमा सहभागी भएका छन् । पत्रकार सम्मेलनमा दुवै नेताहरू शर्मासँगै उपस्थित थिए ।

शर्माले प्रगतिशील अभियान नेपालमार्फत माओवादी आन्दोलनका बाँकी कार्यभार पूरा गर्ने र वाम आन्दोलनलाई नयाँ ढंगले पुनःगठन गर्ने घोषणा गरेका छन् । उनले माओवादी केन्द्रका अध्यक्ष पुष्पकमल दाहाल ‘प्रचण्ड’ माथि गम्भीर आरोप लगाउँदै भने, “अध्यक्ष प्रचण्डले माओवादी पार्टी छाडेर माधवकुमार नेपालको नीतिमा आत्मसमर्पण गर्नुभयो । हामीले त्यो कुरा स्वीकार गरेका छैनौं ।”

उनका अनुसार माओवादी केन्द्रको महाधिवेशन आयोजक समितिले आफ्नो अधिकार क्षेत्रभन्दा बाहिर गएर ‘एकताको नाटक’ खेलेको हो । शर्मा भन्छन्, “महाधिवेशन गर्ने भनेर बनेको आयोजक समितिले त्यही महाधिवेशन टारेको छ । प्रतिस्पर्धाबाट नेतृत्व स्थापित हुन नदिने, विधि र पद्धति मिच्ने काम भइरहेको छ ।”

शर्माले वर्तमान माओवादी नेतृत्वमाथि सांगठनिक अराजकता र स्वार्थकेन्द्रित राजनीतिको आरोप लगाउँदै भने, “हजारौं केन्द्रीय कमिटी र सयौं सचिवालय बनाइँदैछन्, जसको कुनै अर्थ रहने छैन । यो क्रमले विधिहीनतालाई संस्थागत गर्छ ।”

उनीसँग संवादमा रहेका नेताहरूमा एकीकृत समाजवादीका असन्तुष्ट नेताहरू ( झलनाथ खनाल, घनश्याम भुसाललगायत) पनि रहेको बताइएको छ ।

शर्माले आफ्नो नयाँ अभियानलाई सहिदहरूको बलिदान र अधूरा क्रान्तिकारी लक्ष्य पूरा गर्ने प्रयासको रूपमा प्रस्तुत गर्दै भने, “हामीले सहिदका बलिदानलाई खेर जान दिनेछैनौं । जनताको पक्षमा प्रगतिशील पुनर्गठनको यात्रा अब नयाँ ढंगले अघि बढ्नेछ ।”