मौसम पूर्वानुमानः केही स्थानमा मध्यमदेखि भारी वर्षाको सम्भावना

काठमाडौं । हाल मनसुनको न्यून चापीय रेखा औसत स्थानभन्दा दक्षिणतिर सरेको छ । यसको प्रभावले सुदूरपश्चिम प्रदेशसहित देशका पहाडी भूभागमा सामान्य बदली छ भने, अन्य स्थानहरूमा आंशिक बदली रहने मौसम पूर्वानुमान महाशाखाले जानकारी दिएको छ ।

महाशाखाका अनुसार बागमती प्रदेशका थोरै स्थानहरू तथा कोशी, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानहरूमा हाल मध्यम वर्षा भइरहेको छ ।

आज दिउँसो देशभर सामान्य बदली रहनेछ । लुम्बिनी र सुदूरपश्चिम प्रदेशसहित देशका पहाडी भूभागका केही स्थानहरूमा र तराईका थोरै स्थानहरूमा
मध्यम वर्षाको सम्भावना रहेको छ ।

त्यस्तै आज राति पनि देशभर सामान्य बदली रहने अनुमान गरिएको छ । कोशी, बागमती, गण्डकी र सुदूरपश्चिम प्रदेशका केही स्थानहरूमा र अन्य प्रदेशका थोरै स्थानहरूमा मध्यम वर्षा हुनसक्नेछ । साथै, कोशी, बागमती, गण्डकी र कर्णाली प्रदेशका पहाडी भूभागका एक–दुई स्थानहरूमा भारी वर्षा हुने सम्भावना रहेको छ ।

मौसम पूर्वानुमान महाशाखाले भारी वर्षाको सम्भावना रहेका स्थानहरूमा सावधानी अपनाउन सबैलाई सतर्कता अपनाउन अनुरोध गरेको छ ।