देशभर मनसुन सक्रिय, चार प्रदेशमा भारी वर्षाको चेतावनी

काठमाडौं । मनसुनको न्यून चापीय रेखा हाल पश्चिमतर्फ नेपालको तराई आसपास र पूर्वतर्फ तराईभन्दा केही दक्षिणतिर अवस्थित भएकाले आगामी २४ घण्टामा मनसुन पूर्वी भूभागभन्दा पश्चिमी नेपालमा बढी सक्रिय हुने अनुमान गरिएको छ ।

जल तथा मौसम विज्ञान विभागको मौसम पूर्वानुमान महाशाखाका अनुसार हाल देशभर पूर्ण रूपमा बादल छाएको छ । कोशी, बागमती, गण्डकी, लुम्बिनी र कर्णाली प्रदेशका धेरै स्थानहरूमा मध्यम वर्षा भइरहेको छ भने बाँकी प्रदेशका केही भागमा पनि पानी परिरहेको छ ।

दिउँसोको मौसममा पनि अधिकांश स्थानमा बादल नै रहनेछ । कर्णाली र सुदूरपश्चिम प्रदेशका पहाडी भूभागका केही ठाउँमा, साथै मधेश प्रदेशसहित बाँकी तराई भागका केही स्थानमा मध्यम वर्षा पर्न सक्ने देखिन्छ । यसबाहेक, सुदूरपश्चिम र कर्णालीका पहाडी क्षेत्रका एक–दुई स्थानमा भारी वर्षाको सम्भावना छ ।

रातको समयमा पनि देशभर साधारणतया बदली रहनेछ । कोशी, बागमती, गण्डकी र लुम्बिनीका पहाडी भागका केही स्थानमा, तथा मधेशसहित अन्य पहाडी र तराई क्षेत्रमा मध्यम वर्षा हुने पूर्वानुमान छ । साथै, कोशीका पहाडी क्षेत्रमा एक–दुई स्थानमा भारी वर्षा पर्न सक्ने संभावना छ ।

विशेषगरी गण्डकी र लुम्बिनीका पहाडी भूभागका केही स्थान, लुम्बिनी र सुदूरपश्चिमका तराई क्षेत्र, तथा कर्णालीका पहाडी भागका एक–दुई स्थानमा भारीदेखि अत्यधिक वर्षा हुन सक्ने भएकाले भू–क्षय, बाढी, पहिरो, गेग्रान बहाव तथा तराई र शहरी क्षेत्रमा डुबानको जोखिम रहेको चेतावनी दिइएको छ । ठूला–साना नदी, नाला र खोलामा पानीको सतह बढ्न सक्ने, साथै दैनिक जनजीवन, कृषि, स्वास्थ्य, पर्यटन, निर्माण, सडक र हवाई यातायातमा असर पर्न सक्ने भएकाले आवश्यक सतर्कता र पूर्वतयारी अपनाउन र पछिल्लो मौसमी सूचना नियमित रूपमा लिन महाशाखाले सर्वसाधारण र सरोकारवाला निकायलाई आग्रह गरेको छ ।