महागुरु फाल्गुनन्दको १४१औँ जन्मजयन्ती विभिन्न कार्यक्रमका साथ मनाइँदै

काठमाडौं । किरात धर्मावलम्बीका महागुरु फाल्गुनन्द लिङ्देनको १४१औँ जन्मजयन्ती मंगलबार (आज) देशभर विविध कार्यक्रमहरू आयोजना गरी श्रद्धापूर्वक मनाइँदैछ । किराती समुदायका लागि महागुरु फाल्गुनन्द केवल धार्मिक व्यक्तित्व मात्र नभई समाज सुधारक, भाषाविद् र सांस्कृतिक जागरणका प्रतीकका रूपमा सम्मानित छन् ।

फाल्गुनन्दको जीवन यात्रा
फाल्गुनन्द लिङ्देनको जन्म वि.सं. १९४२ कात्तिक २५ गते इलाम जिल्लामा सामान्य परिवारमा भएको थियो । लिङ्देन सानै उमेरदेखि नै धर्म, संस्कृति र समाज सुधारतर्फ आकर्षित भए । किरात धर्म, भाषा, लिपि, संस्कार र संस्कृति जोगाउन र विकास गर्न लिङ्देनले जीवनभर समर्पित भएर काम गरे ।

सत्य धर्म मुचुल्काः समाज सुधारको दस्तावेज
किरात समाजमा देखिएका विकृति–विसङ्गतिहरू अन्त्य गर्न महागुरु फाल्गुनन्दले समाज सुधारका लागि ‘सत्य धर्म मुचुल्का’ नामक नीति निर्माण गरे । यो ऐतिहासिक दस्तावेज वि.सं. १९८८ साल वैशाख २४ गते जारी गरिएको थियो, जसले किरात समुदायमा एकता, नैतिकता र आध्यात्मिक चेतना फैलाउने काम गर्‍यो ।

राष्ट्रिय विभूति र किरात समुदायमा श्रद्धा
महागुरु फाल्गुनन्दको वि.सं. २००५ मा निधन भएको थियो । फाल्गुनन्दको असाधारण योगदानको सम्मानस्वरूप सरकारले वि.सं. २०६६ मङ्सिर १६ गते ‘राष्ट्रिय विभूति’ को उपाधि प्रदान गरेको हो ।

पूर्वी पहाडी जिल्ला ताप्लेजुङ, तेह्रथुम, पाँचथर, इलाम, झापा लगायतका क्षेत्रमा बसोबास गर्ने किराती समुदायले हरेक वर्ष फाल्गुनन्द जयन्ती मनाउने परम्परा कायम राखेका छन् ।

राजधानीमा विशेष कार्यक्रम
काठमाडौंमा पनि किरात समुदायले विविध सांस्कृतिक र धार्मिक कार्यक्रम आयोजना गरी फाल्गुनन्द जयन्ती मनाउँदैछन् । कार्यक्रममा किरात धर्मका पुरोहित, विद्वान् र युवा पुस्ताको सक्रिय सहभागिता रहन्छ ।

महागुरु फाल्गुनन्दको शिक्षा, दर्शन र योगदान आज पनि किरात समुदाय मात्र होइन, समग्र नेपाली समाजका लागि प्रेरणादायी बनेको छ ।