रावल आज नेपाली कम्युनिष्ट पार्टीमा प्रवेश गर्दै, मातृभूमि जागरण अभियान समाहित हुने

काठमाडौं । नेकपा (एमाले) का पूर्व उपाध्यक्ष भीम रावल आज (बुधबार) काठमाडौंमा आयोजित विशेष कार्यक्रममा नेपाली कम्युनिष्ट पार्टी (नेकपा) मा औपचारिक रूपमा प्रवेश गर्दै छन् । रावलले केही समयअघि स्थापना गरेको ‘मातृभूमि जागरण अभियान, नेपाल’ समेत नयाँ पार्टीमा समाहित हुने भएको छ ।

पार्टी स्रोतका अनुसार, रावललाई नेपाली कम्युनिष्ट पार्टीको हाइकमाण्ड सदस्यको रूपमा भूमिकासहित स्वागत गरिने तयारी गरिएको छ । पार्टीभित्र रावललाई संगठन सुदृढीकरण र नीति निर्माणमा जिम्मेवारी दिनेबारे छलफल भइरहेको बताइएको छ ।

रावलले आइतबारमात्र पार्टी संयोजक पुष्पकमल दाहाल ‘प्रचण्ड’ र वरिष्ठ नेता माधवकुमार नेपाल लगायतका नेतासँग विस्तृत संवाद गरेका थिए । सो छलफलपछि उनले आफ्नो अभियान र विचारधारात्मक धारलाई व्यापक राजनीतिक एकतामा रूपान्तरण गर्ने निष्कर्ष निकालेका हुन् ।

उनले हालको राजनीतिक अस्थिरता, विभाजन र वैचारिक विचलनको अवस्थामा कम्युनिष्ट शक्तिहरूबीच एकता अपरिहार्य रहेको धारणा राख्दै समायोजनमा सहमति जनाएका हुन् ।

आज दिउँसो काठमाडौंमा हुने ‘बृहत् पार्टी समायोजन कार्यक्रम’ मार्फत भीम रावलले औपचारिक रूपमा नेपाली कम्युनिष्ट पार्टीको सदस्यता ग्रहण गर्ने कार्यक्रम तय गरिएको छ । उक्त कार्यक्रममा प्रचण्ड, माधव नेपालसहित अन्य वरिष्ठ नेताहरूको उपस्थितिमा रावलले पार्टी प्रवेश घोषणा गर्नेछन् ।

रावलले यसअघि एमालेमा लामो समय नेतृत्व गर्दै संविधान निर्माण, पार्टी संगठन तथा नीतिगत सवालमा सक्रिय भूमिका खेलेका थिए । अहिले उनले नयाँ राजनीतिक सहकार्यको माध्यमबाट मुलुकको राजनीतिक स्थायित्व र वैचारिक स्पष्टता कायम गर्ने लक्ष्य लिएका छन् ।