‘मोन्था’ चक्रवातको प्रभाव कमजोर, देशभर मौसममा सुधार

काठमाडौं । बङ्गालको खाडीबाट उत्पन्न ‘मोन्था’ चक्रवातको प्रभाव क्रमशः कमजोर हुँदै गएसँगै देशभरको मौसममा सुधार आउन थालेको छ ।

मौसमविद्हरूका अनुसार आजदेखि देशका अधिकांश भू–भागमा मौसम थप स्थिर र सफा हुने अनुमान गरिएको छ, यद्यपि केही स्थानहरूमा आज पनि हल्का वर्षाको सम्भावना कायमै छ ।

पश्चिमी वायु र अरब सागरमा बनेको न्यून चापीय प्रणालीको प्रभाव अझै केही हदसम्म बलियो रहेको कारण केही स्थानहरूमा बदली यथावत् रहेको छ
।

जल तथा मौसम विज्ञान विभागका अनुसार कोशी, बागमती र गण्डकी प्रदेशका पहाडी क्षेत्रका केही स्थानहरूमा हल्का वर्षा र हिमपात हुन सक्ने सम्भावना छ। विभागले जानकारी दिएको अनुसार, पहाडी भू–भागमा आंशिक बदली रहँदा बाँकी अधिकांश क्षेत्रमा आज मौसम मुख्यतः सफा रहनेछ ।

दिउँसो कोशी, बागमती र गण्डकी प्रदेशमा सामान्यतया बदली रहने, मधेस प्रदेशलगायत अन्य पहाडी क्षेत्रहरूमा आंशिक बदली रहने तथा बाँकी भू–भागमा मौसम सफा रहने पूर्वानुमान गरिएको छ । राति भने यी प्रदेशका पहाडी भागमा आंशिक बदली रहने र अन्य प्रदेशमा मौसम सामान्य रूपमा सफा रहनेछ ।

विभागका अनुसार कोशी, बागमती र गण्डकी प्रदेशका पहाडी तथा हिमाली भागका एक–दुई स्थानमा हल्का वर्षा र हिमपातको सम्भावना अझै कायम छ ।