यूएईमा कार्यरत नेपालीलाई नियम पालना गर्न नेपाली दूतावासको आग्रह

काठमाडौं । संयुक्त अरब इमिरेट्स (यूएई) मा रहेका नेपाली नागरिकलाई त्यहाँको कानून, नियम र सामाजिक मर्यादाको पूर्ण पालना गर्न नेपाली राजदूतावास, अबुधाबीले आग्रह गरेको छ ।

मंगलबार एक अत्यन्त जरुरी सूचना जारी गर्दै दूतावासले यूएईमा विभिन्न पेशा तथा व्यवसायमा कार्यरत नेपालीहरूलाई मर्यादित, अनुशासित, इमान्दार र कर्तव्यनिष्ठ रहन आग्रह गरेको हो । साथै, आफू बसोबास गरिरहेको देशको कानून, मूल्य मान्यता र सामाजिक अनुशासनको सम्मान गर्न पनि आग्रह गरिएको छ ।

दूतावासका अनुसार हालका दिनमा यूएईमा रहेका केही नेपाली मादक पदार्थको सेवन, झैझगडा, बैंकिङ्ग कसुर, आपसी नगद लेनदेन, लागुऔषध ओसारपसार, इमिरेट्स आइडीको दुरुपयोग, साइबर अपराध, अध्यागमन तथा ट्राफिक नियमको उल्लंघन, र फ्रिल्यान्स भिसाको प्रलोभनजस्ता गतिविधिमा संलग्न भएर समस्यामा पर्ने क्रम बढिरहेको छ ।

‘यी सबै क्रियाकलाप यूएईको कडा कानूनअनुसार दण्डनीय छन्’, दूतावासले स्पष्ट पारेको छ, ‘यसैले सम्पूर्ण नेपाली समुदायले यस्ता गतिविधिबाट टाढा रहन र विशेष सावधानी अपनाउनुपर्छ ।’

दूतावासले पछिल्लो समय ‘जेनजी आन्दोलन’पछि यूएईले नेपालीहरूका लागि भिजिट भिसा रोक लगाउनुका साथै वर्किङ भिसामा कडाइ गरेको पनि जानकारी दिएको छ ।

राजदूतावासले नेपाली समुदायलाई युएईमा आफ्नो इज्जत, सुरक्षाको रक्षा गर्नुका साथै नेपाल र नेपालीको छविमा आँच आउन नदिन विशेष ध्यान दिन आग्रह गरेको छ ।