संघीय संसदको चालू अधिवेशन शुक्रबार रातिदेखि अन्त्य

काठमाडौं । राष्ट्रपति रामचन्द्र पौडेलले संघीय संसदका प्रतिनिधिसभा र राष्ट्रिय सभाको चालू अधिवेशन अन्त्य गरेका छन् ।

राष्ट्रपति कार्यालयले जारी गरेको जानकारीअनुसार सरकारको सिफारिसमा राष्ट्रपति पौडेलले असोज १६ गते शुक्रबार राति १२ बजेदेखि लागू हुने गरी दुवै सदनको अधिवेशन अन्त्य गरेका हुन् ।

संविधानको धारा ९३ को उपधारा (२) बमोजिम मन्त्रिपरिषद्को सिफारिसमा राष्ट्रपतिले संघीय संसदको अधिवेशन अन्त्य गरेका हुन् । संविधानले संसद्को अधिवेशन बोलाउने र अन्त्य गर्ने सम्बन्धमा राष्ट्रपतिलाई यस्तो अधिकार दिएको छ ।

वैशाख २८ गतेदेखि सुरु भएको चालू अधिवेशनमा सरकारले आर्थिक वर्षसँग सम्बन्धित बजेट तथा विभिन्न कानुन निर्माणको प्रक्रिया अघि बढाएको थियो । अधिवेशनका क्रममा बजेट पारित गर्नुका साथै बजेट कार्यान्वयनसँग सम्बन्धित कानुनसमेत निर्माण भएका छन् ।

यस अवधिमा संसद् अधिवेशनमा नरहेको समयमा सरकारले जारी गरेका विभिन्न अध्यादेशसमेत संसद्बाट स्वीकृत भएका छन् । ती अध्यादेशमार्फत गरिएका कानुनी संशोधनलाई निरन्तरता दिन सरकारले पेस गरेका प्रतिस्थापन विधेयकहरू पनि संसद्बाट पारित भएका छन् ।

यससँगै चालू अधिवेशनमा विधेयक निर्माण, बजेट पारित तथा अध्यादेशलाई कानुनी प्रक्रियामार्फत अघि बढाउने लगायतका काम भएका छन् ।