चीनका प्रधानमन्त्री ली छ्याङद्वारा प्रधानमन्त्री बालेन्द्र शाहलाई बधाई

काठमाडौं । चीनका प्रधानमन्त्री ली छ्याङले नेपालका नवनियुक्त प्रधानमन्त्री बालेन्द्र शाहलाई बधाई सन्देश पठाउँदै दुई देशबीचको सम्बन्धलाई अझ सुदृढ बनाउन प्रतिबद्धता जनाएका छन् ।

बधाई सन्देशमा उनले चीन र नेपालबीचको सम्बन्ध पहाड र नदीले जोडिएको परम्परागत मित्रताको रूपमा रहेको उल्लेख गरेका छन् । दौत्य सम्बन्ध स्थापना भएको ७१ वर्षदेखि दुवै देशले शान्तिपूर्ण सहअस्तित्वका पाँच सिद्धान्तका आधारमा आपसी सम्बन्धलाई निरन्तर अघि बढाउँदै आएको उनले बताएका छन् ।

ली छ्याङले नेपालको नयाँ सरकारप्रति चीनको पूर्ण समर्थन रहेको जनाउँदै नेपालको स्वतन्त्रता, सार्वभौमिकता र भौगोलिक अखण्डताको रक्षा गर्न सधैं साथ रहने स्पष्ट पारे । उनले चीनले नेपालको विकास यात्रामा साझेदार बन्ने चाहना राखेको पनि व्यक्त गरे ।

सन्देशमा उनले उच्चस्तरीय सहकार्यलाई अझ मजबुत बनाउँदै बेल्ट एन्ड रोडको संयुक्त निर्माण अन्तर्गत संयुक्त परियोजनाहरू अघि बढाउन र विभिन्न क्षेत्रमा सहयोग विस्तार गर्न इच्छुक रहेको बताएका छन् ।

यसै क्रममा उनले चीन–नेपालबीचको विकास र समृद्धिमा केन्द्रित दीर्घकालीन मैत्रीपूर्ण रणनीतिक साझेदारीलाई नयाँ उचाइमा पुर्‍याउने आफ्नो प्रतिबद्धता दोहोर्‍याएका छन् ।