नेपाल प्रहरीमा १९ भदौदेखि चार एआईजी पद रिक्त, नौ डीआईजीबीच प्रतिस्पर्धा

काठमाडौं । नेपाल प्रहरीमा आगामी भदौ १९ गतेदेखि अतिरिक्त महानिरीक्षक (एआईजी)का चार पद रिक्त हुने भएका छन् । नयाँ आईजी नियुक्त भएसँगै प्रहरी संगठनमा ठूलो पदस्थापन चक्र सुरु हुने संकेत देखिएको छ ।

सरकारले हालै केन्द्रीय अनुसन्धान ब्युरो (सीआईबी) प्रमुख चन्द्रकुबेर खापुङलाई नेपाल प्रहरीको ३२औँ महानिरीक्षक (आईजी) बनाइसकेको छ । खापुङले आईजीको पदभार सम्हाल्ने दिनदेखि सीआईबीको नेतृत्वसमेत खाली हुनेछ ।

यसैगरी, हालका आईजी दीपक थापा ३० वर्षे सेवा अवधि पूरा गर्दै १८ भदौको राति १२ बजेदेखि अवकाशमा जाने भएका छन् । थापासँगै उनका ब्याचका एआईजी सन्दीप भण्डारी र टेकबहादुर तामाङ पनि एकैपटक सेवामुक्त हुँदैछन् ।

यता अर्का एआईजी कृष्णहरि शर्मा पोखरेल आज (शनिबार) देखि नै अवकाशमा जाने भएकाले उनलाई शुक्रबार नै प्रधान कार्यालयमा बिदाइ गरिएको छ । यससँगै भण्डारी, तामाङ, शर्मा र हाल आईजी बनेका खापुङको पद रिक्त हुने निश्चित भएको हो ।

नौ डीआईजीबीच बढुवाको प्रतिस्पर्धा
चार एआईजी पद रिक्त भएपछि नौ जना डीआईजीबीच बढुवाको प्रतिस्पर्धा हुनेछ । प्रतिस्पर्धामा रहेका डीआईजीहरूमा सुशिलसिंह राठौर, उमाप्रसाद चतुर्वेदी, हिमालयकुमार श्रेष्ठ, डम्बरबहादुर बिक, ईश्वर कार्की, राजेन्द्रप्रसाद भट्ट, दिनेशकुमार आचार्य, अरुण पौडेल र गोविन्द थपलिया छन् ।

मन्त्रिपरिषद्को निर्णयले टुंगो लगाउने
भदौ १९ पछि बस्ने मन्त्रिपरिषद्को बैठकले यी नौ डीआईजीमध्ये चार जनालाई एआईजीमा बढुवा गर्नेछ । बढुवापछि नयाँ पदस्थापनसमेत हुने भएकाले प्रहरी संगठनमा नेतृत्व तहमा ठूलो चलायमान देखिने अपेक्षा गरिएको छ ।

यसरी एउटै समयमा चार एआईजी पद रिक्त हुनु नेपाल प्रहरीको हालसम्मकै ठूलो पदस्थापन चक्रमध्ये एक मानिएको छ । यसले आगामी दिनमा प्रहरी संगठनको नेतृत्व संरचनामा महत्वपूर्ण प्रभाव पार्ने अनुमान गरिएको छ ।