भारत–चीन समझौतामाथि क्रान्तिकारी कम्युनिस्ट पार्टी नेपालको आपत्ति

काठमाडौं । क्रान्तिकारी कम्युनिस्ट पार्टी नेपालले भारत र चीनले नेपालप्रति हेपाहा प्रवृत्ति देखाएको आरोप लगाएको छ ।

पार्टीले आज सार्वजनिक गरेको विज्ञप्तिमा भनिएको छ, “नेपालको अभिन्न भूभाग कालापानी र लिपुलेक हुँदै भारत र चीनबीच व्यापारमार्ग विस्तार गर्ने हालैको समझौताप्रति हाम्रो गम्भीर ध्यानाकर्षण भएको छ ।”

विज्ञप्तिमा नेपाललाई पूर्ण बेवास्ता गरी नेपाली भूमिबाट व्यापारमार्ग खोल्ने निर्णयलाई नेपालको सार्वभौमिकता, राष्ट्रिय स्वाधीनता र भौगोलिक अखण्डतामाथि प्रत्यक्ष हस्तक्षेप गरिएको भन्दै आपत्ति जनाइएको छ ।

सो पार्टीले यस विषयमा जोडदार आवाज उठाउन सबै देशभक्त नेपालीलाई आह्वान गर्दै समस्या समाधानका लागि नेपाल सरकारमाथि दबाब सिर्जना गर्न आग्रह गरेको छ ।