कक्षा १२ को वार्षिक परीक्षा फाराम खुला, पुस मसान्तभित्र बुझाउनुपर्ने

काठमान्डु । राष्ट्रिय परीक्षा बोर्डले २०८३ सालमा सञ्चालन हुने कक्षा १२ को वार्षिक परीक्षाका लागि आवेदन फाराम खुला गरेको छ । बोर्डले शैक्षिक सत्र २०८२/०८३ को स्वीकृत वार्षिक कार्यतालिकाअनुसार नियमित तथा आंशिक दुबै समूहका विद्यार्थीलाई लक्षित गरी आवेदन आह्वान गरेको हो ।

बोर्डका अनुसार साधारण शुल्कमा आवेदन दिन चाहने विद्यार्थीले २०८२ पुस मसान्तभित्र परीक्षा शुल्क बुझाइसक्नुपर्नेछ । तोकिएको समयमा नबुझाए माघ १५ गतेसम्म विलम्ब शुल्कसहित आवेदन फाराम भर्न सकिने व्यवस्था गरिएको छ ।

यस वर्षको परीक्षामा नियमिततर्फ रजिस्ट्रेसन नम्बरको सुरुका दुई अङ्क ८२ भएका विद्यार्थी मात्र सहभागी हुन पाउनेछन् । आंशिकतर्फ भने रजिस्ट्रेसन नम्बर ७९, ८० र ८१ बाट सुरु हुने परीक्षार्थीले आवेदन दिन पाउने बोर्डले जनाएको छ ।

नियमित परीक्षार्थी हुन कक्षा ११ को सैद्धान्तिक विषयमा न्यूनतम ‘डी’ ग्रेड तथा आन्तरिक वा प्रयोगात्मकतर्फ ‘सी’ ग्रेड अनिवार्य गरिएको छ । साथै, आवेदन फारामसँगै विद्यालयबाट प्रमाणित कक्षा ११ को ग्रेडसिट र रजिस्ट्रेसन कार्डको प्रतिलिपि बुझाउनुपर्नेछ ।

परीक्षा शुल्क प्रतिविद्यार्थी ८०० रुपैयाँ तोकिएको छ भने विलम्ब शुल्कसहित १६०० रुपैयाँ बुझाउनुपर्ने व्यवस्था छ । भौतिक विज्ञान, जीव विज्ञान, रसायन विज्ञान, कम्प्युटर विज्ञान र होटल म्यानेजमेन्टजस्ता बाह्य परीक्षक आवश्यक पर्ने विषयमा अतिरिक्त प्रयोगात्मक शुल्क लाग्नेछ ।

प्रयोगात्मक शुल्कको केही हिस्सा विद्यालयले आन्तरिक परीक्षकका लागि राखी बाँकी रकम बोर्डको खातामा जम्मा गर्नुपर्नेछ । प्रयोगात्मक परीक्षा २०८२ चैत ३० गतेभित्र सम्पन्न गरी वैशाख १५ गतेसम्म प्राप्ताङ्क बोर्डमा पठाइसक्नुपर्ने कार्यतालिका तय गरिएको छ ।

आंशिक परीक्षार्थीले आफूले कक्षा १२ को नियमित परीक्षा दिएको विद्यालयबाट मात्रै आवेदन दिन पाउनेछन् । कक्षा ११ मा अध्ययन गरेकै विषय र समूहअनुसार विषय छनोट गर्नुपर्नेछ, अन्यथा आवेदन स्वतः रद्द हुने चेतावनी बोर्डले दिएको छ ।

आवेदन फाराम विद्यार्थी स्वयंले भर्नुपर्ने र विद्यालयले ती विवरण बोर्डको अनलाइन पोर्टलमार्फत प्रविष्टि गर्नुपर्नेछ । परीक्षा शुल्क भुक्तानीका लागि बैंक भौचरका साथै कनेक्ट आईपीएस, ई–सेवा, खल्ती र आईएमई–पेजस्ता डिजिटल माध्यम प्रयोग गर्न सकिने व्यवस्था पनि गरिएको छ ।