टी–२० विश्वकप एसिया छनोटमा नेपालको लगातार दोस्रो जित, सुपर सिक्समा स्थान पक्का

काठमाडौं । आईसीसी टी–२० विश्वकप एसिया इस्ट प्यासिफिक छनोट अन्तर्गत शुक्रबार भएको खेलमा नेपालले जापानलाई ५ विकेटले पराजित गर्दै सुपर सिक्समा प्रवेश गरेको छ । यो नेपालको लगातार दोस्रो जित हो ।

समूह बी को अन्तिम खेलमा नेपालले जापानलाई हराउँदै समूह विजेता बनेको हो । यो जितसँगै नेपालले सुपर सिक्समा २ अंक जोडेको छ भने जापान अंकविहीन अवस्थामा सुपर सिक्समा पुगेको छ ।

समूह बी मा रहेका तीन टोलीमध्ये नेपाल र जापानले कुवेतलाई पराजित गरेका थिए । तर, कुवेत समूह चरणबाटै बाहिरिएकोले उनीहरूसँग जितेको अंक सुपर सिक्समा जोडिने छैन ।

नेपाल समूह विजेता र जापान उपविजेता बनेका छन् ।

समूह ए बाट यूएई र कतार सुपर सिक्समा प्रवेश गरिसकेका छन् । समूह सी बाट पुग्ने दुई टोलीको टुंगो अझै लाग्न बाँकी छ । नेपालले अब सुपर सिक्समा जापानबाहेक अन्य चार टोलीसँग प्रतिस्पर्धा गर्नेछ ।

सुपर सिक्स चरणको शीर्ष ३ टोलीले भारत र श्रीलंकामा आयोजना हुने आगामी वर्षको टी–२० विश्वकपमा स्थान बनाउनेछन् ।

ओमानको एल एमिरेट मैदानमा टस जितेर नेपालले जापानलाई पहिले ब्याटिङ गर्न निम्तो दिएको थियो । जापानले निर्धारित २० ओभरमा ८ विकेट गुमाउँदै १३१ रन बनायो ।

कप्तान केन्डेल काडोवाकी फ्लेमिङले सर्वाधिक ६० रन (४६ बल, ५ चौका, ३ छक्का) बनाए । इसाम रहमानले ३१ रनको योगदान गरे ।

नेपालका लागि गुल्सन झा र सन्दीप लामिछानेले समान २–२ विकेट लिए । सोमपाल कामी र नन्दन यादवले एक–एक विकेट झारे ।

१३२ रनको लक्ष्य नेपालले १८ ओभरमा ५ विकेट गुमाउँदै भेट्टायो । ओपनरहरू कुशल भुर्तेल र आशिफ शेखले ५ ओभरमा ३६ रनको साझेदारी गर्दै राम्रो सुरुआत दिलाए ।

कुशल भुर्तेलले २१ बलमा ३ चौका प्रहार गर्दै २१ रनको योगदान गरे भने आशिफ शेखले पनि २१ बल खेल्दै, १ चौका, ४ छक्का ३८ रनको योगदान गरे । कप्तान रोहित पौडेलले १८ रन जोडे । अन्त्यतिर गुल्सन झाले (२० बल, १ चौका, २ छक्का) जोडे भने दिपेन्द्र सिंह ऐरीले १४ बल खेल्दै १४ रन सहित अविजित रहे ।

गुल्सन र दिपेन्द्रबीच छैटौँ विकेटका लागि ४२ रनको साझेदारी भयो जसले नेपाललाई जिततर्फ डोर्यायो ।

नेपालले टी–२० विश्वकप छनोटको समूह चरण उत्कृष्ट प्रदर्शनसहित टुंग्याएको छ । सुपर सिक्समा अब थप चुनौतीपूर्ण खेलहरू हुनेछ, जहाँ शीर्ष तीनमा पर्न नेपाललाई निरन्तरता र उत्कृष्टता आवश्यक हुनेछ ।