रौतहटमा सुटकेशभित्र फेला परेको शव २६ वर्षीया महिलाको

रौतहट । सदरमुकाम गौरमा सुटकेशभित्र फेला परेको शवको सनाखत भएको छ । मृतक रौतहटको माधव नारायण नगरपालिका–२ महादेवपट्टीकी २६ वर्षीया रुबीकुमारी साह भएको जिल्ला प्रहरी कार्यालय रौतहटका डीएसपी राजु कार्कीले जानकारी दिएका छन् ।

गौर–सिरसिया सडकखण्डअन्तर्गत गौर नगरपालिका–९ मा रहेको दिव्यज्योति स्कुलको गेट नजिकै गएराति स्थानीयले ठूलो सुटकेश देखेपछि प्रहरीलाई खबर गरेका थिए ।

डीएसपी कार्कीका अनुसार रुबी आमासँगै बस्ने गर्थिन् र सोमबार दिउँसो घरबाट बाहिर निस्किएकी थिइन् । दिउँसो करिब ४ बजेसम्म परिवारसँग सम्पर्क भए पनि त्यसपछि सम्पर्कविहीन भएकी थिइन् ।

प्रारम्भिक अनुसन्धानअनुसार घाँटी कसी हत्या गरेर शव सुटकेशमा हालिएको अनुमान गरिएको छ । शवलाई पोष्टमार्टमका लागि जिल्ला अस्पताल गौरमा राखिएको प्रहरीले जनाएको छ ।