देशैभर बाढी–पहिरोको असरः १२ सडक पूर्ण रूपमा ठप्प, १४१ ठाउँमा एकतर्फी आवागमन

काठमाडौं । निरन्तरको मनसुन वर्षासँगै आएको बाढी र पहिरोका कारण देशभर १२ वटा सडक पूर्ण रूपमा अबरुद्ध हुनुका साथै १४१ स्थानमा सवारी एकतर्फी मात्र संचालन भएको सडक विभागले जनाएको छ ।

विभागका अनुसार मंगलबार बिहान हुम्लाको कटकुना र पैमा खोलामा पहिरो जाँदा कर्णाली करिडोरअन्तर्गत खुलालु–सल्लिसल्ला सडक ठप्प बनेको छ । त्यसैगरी, दार्चुलाको रानीबासमा पहिरो खस्दा दार्चुला–टिंकर सडक अवरुद्ध भएको छ भने दैलेखको डुल्लु नगरपालिका–५ बागडुल्लामा पहिरो आएपछि खुलालु–मान्मा–नाग्मा–जुम्ला सडक चार दिनदेखि बन्द भएको छ ।

रोल्पाको पुतलाचौर र ग्राम्जिम क्षेत्रमा पहिरो जाँदा शहीदमार्ग गत १४ दिनदेखि अबरुद्ध छ । यस्तै पश्चिम रुकुममा चौखा खोला रिजगाड, उसुम खोला र छलगाड क्षेत्रमा पहिरो जाँदा भेरी करिडोरअन्तर्गत छिन्चु–दुनै सडक १५ दिनदेखि सञ्चालन हुन सकेको छैन ।

सिन्धुपाल्चोकको कोदारीमा पहिरोले १६ दिनदेखि अरनिको राजमार्ग ठप्प भएको छ । रसुवागढी–स्याफ्रुबेंसी सडकसमेत तीन सातादेखि अवरुद्ध छ भने मितेरी पुल बाढीले बगाएको डेढ महिनासम्म पनि बेलिब्रिज जडान हुन नसक्दा आवागमन ठप्प छ ।

पूर्वी नेपालतर्फको अवस्था पनि गम्भीर छ। तमोर करिडोर एक महिनादेखि पूर्ण रूपमा बन्द छ । ताप्लेजुङको फक्ताङ्लुङ–५ र ६ जोड्ने रानीपुल बेलिब्रिज बाढीले बगाउँदा यातायात रोकिएको छ । संखुवासभाको बरुण खोला र कोशी राजमार्गमा आएको बाढीले डाइभर्सन बगाएपछि त्यो मार्ग पनि एक महिनादेखि बन्द छ ।

सडक विभागका अनुसार अवरुद्ध सडकहरू खुलाउने प्रयास तीव्र पारिएको छ र आवश्यक उपकरण तथा जनशक्ति परिचालन भइरहेको छ ।