उद्दारमा सघाउन चिलिमे सुरुङमा पुगे कुलमान घिसिङ

काठमाडौं । उज्यालो नेपाल पार्टीका अध्यक्ष तथा पूर्वऊर्जामन्त्री कुलमान घिसिङ रसुवास्थित चिलिमे जलविद्युत् आयोजनाको सुरुङमा जारी उद्दार कार्यमा सहयोग गर्न घटनास्थल पुगेका छन् ।

घिसिङको सचिवालयका अनुसार नेपाली सेनाको आग्रहमा उनी बुधबार चिलिमे पुगेका हुन् । सुरुङभित्र फसेको आशंका गरिएका व्यक्तिको खोजीमा नेपाली सेनासहित विदेशी विज्ञको टोली परिचालित छ । उद्दार टोली सुरुङ छिचोल्दै पावरहाउससम्म पुग्ने प्रयासमा रहेको छ ।

उद्दार कार्यमा आवश्यक प्राविधिक समन्वय तथा सुझावका लागि सेनाले पूर्वऊर्जामन्त्री घिसिङलाई समेत बोलाएको जनाइएको छ । यसअघि भदौ १४ गते पनि घिसिङले चिलिमे सुरुङलगायत बाढी प्रभावित क्षेत्रको स्थलगत रेकी गरेका थिए ।

उद्दार टोलीले सुरुङभित्र करिब २०० मिटर अगाडि रहेको पावरहाउस क्षेत्रमा पुग्ने लक्ष्यसहित काम अघि बढाइरहेको छ । मंगलबारसम्म टोलीले सुरुङभित्र करिब ९० मिटर दूरी पार गरिसकेको थियो ।

करिब ६० मिटर लामो, २५ मिटर अग्लो र २० मिटर चौडा पावरहाउसको माथिल्लो भागमा चामल, पानी, चिनी, चियालगायत खाद्य सामग्री तथा पर्याप्त समयसम्म बत्ती बाल्न सकिने ठूलो ब्याट्री बैंक रहेको बताइएको छ ।

सुरुङभित्र सम्पर्कविहीन रहेका ६ जना पावरहाउस क्षेत्रमा हुन सक्ने आशंका गरिएको छ । उनीहरूको अवस्थाबारे यकिन गर्न उद्दार टोलीले निरन्तर सुरुङभित्र खोजी तथा पहुँच विस्तारको काम गरिरहेको छ ।