लगातार दोस्रो जितसँगै नेपाल काभा महिला भलिबलको सेमिफाइनलमा

काठमाडौं । नेपाल काठमाडौंमा जारी काभा महिला भलिबल च्याम्पियनसिप २०२६ को सेमिफाइनलमा प्रवेश गरेको छ । नेपाली राष्ट्रिय महिला भलिबल टोलीले लगातार दोस्रो जित दर्ता गर्दै सेमिफाइनलमा स्थान सुरक्षित गरेको हो ।

आइतबार त्रिपुरेश्वरस्थित राष्ट्रिय खेलकुद परिषद्को बहुउदेश्यीय कभर्डहलमा सम्पन्न खेलमा नेपालले माल्दिभ्स राष्ट्रिय महिला भलिबल टोलीलाई ३–० को सोझो सेटमा पराजित गर्दै अन्तिम चारमा प्रवेश गरेको हो ।

नेपालले मालदिभ्समाथि २५–१२, २५–९ र २५–२० को सहज जित दर्ता गर्‍यो । कप्तान निरुता ठगुन्नाको उत्कृष्ट प्रदर्शनमा घरेलु टोलीले खेलभर दबाब कायम राखेको थियो । उनी नै खेलको ‘प्लेयर अफ द म्याच’ घोषित भइन् ।

यो जितपछि नेपालले अंक तालिकामा सात अंक बनाएको छ । पाँच अंकसहित इन्डियन राष्ट्रि महिला भलिबल टोली दोस्रो स्थानमा रहेको छ भने किर्गिस्तान राष्ट्रिय महिला भलिबल टोली तीन अंकसहित तेस्रो स्थानमा छ। मालदिभ्स भने अंकविहीन रह्यो ।

अब भोलि (सोमबार) हुने भारत र किर्गिस्तानबीचको खेलले सेमिफाइनल पुग्ने अर्को टोलीको टुङ्गो लगाउनेछ । यदि भारत सोझो सेटमा पराजित भए किर्गिस्तान अन्तिम चारमा पुग्नेछ ।

नेपालले प्रतियोगिताको पहिलो खेलमा भारतसँग ३–२ को प्रतिस्पर्धात्मक हार बेहोरेको थियो । त्यसपछि भने किर्गिस्तानलाई ३–० ले हराउँदै पुनरागमन गरेको थियो ।

आइतबारकै अन्य खेलमा इरान राष्ट्रिय महिला भलिबल टोलीले श्रीलंका राष्ट्रिय महिला भलिबल टोलीलाई २५–१६, २५–१३ र २५–११ ले हरायो । यस्तै काजकिस्तान राष्ट्रिय महिला भलिबल टोलीले बंगलादेश राष्ट्रिय महिला भलिबल टोलीमाथि ३–० को जित निकाल्यो ।

च्याम्पियनसिपमा सोमबार तीन खेल हुनेछ । पहिलो खेलमा बंगलादेश र श्रीलंका तथा दोस्रो खेलमा भारत र किर्गिस्तान भिड्नेछन् । तेस्रो खेलमा ईरान र कजाकस्तान भिड्नेछन् ।