स्पेनले जर्मनीलाई हराउँदै पहिलोपटक महिला युरोको फाइनल यात्रा तय गर्‍यो

काठमाडौं । विश्वकप विजेता स्पेनले यूईएफए महिला युरो २०२५ को फाइनलमा स्थान बनाएको छ । स्विट्जरल्यान्डको स्टेडियन लेट्जिग्रन्डमा मंगलबार राति सम्पन्न सेमिफाइनल खेलमा स्पेनले पूर्व उपविजेता जर्मनीमाथि १–० को कठिन जित निकाल्दै ऐतिहासिक सफलता हात पारेको हो ।

निर्धारित ९० मिनेटको समयसम्म दुबै टोली गोलरहित बराबरीमा रोकिएपछि खेल अतिरिक्त समयमा प्रवेश गरेको थियो । त्यसपछि अतिरिक्त समयको दोस्रो हाफमा आइताना बोनमतिको गोल स्पेनका लागि निर्णायक बन्यो ।

यो जितसँगै स्पेन पहिलोपटक महिला युरोपियन च्याम्पियनसिपको फाइनलमा पुगेको हो । यति मात्रै होइन, स्पेन हालसम्म प्रतियोगितामा अपराजित रहँदै फाइनल पुगेको टोली बनेको छ ।

अब उपाधिका लागि उसले साविक विजेता इङल्यान्डसँग भिडन्त गर्नेछ । उल्लेखनीय छ, महिला विश्वकप २०२३ को फाइनलमा पनि यी दुई टोली आमनेसामने भएका थिए, जसमा स्पेनले इङल्यान्डलाई १–० ले पराजित गर्दै उपाधि जितेको थियो ।

यसपटकको युरो फाइनलले फेरि एकपटक विश्वकपको दोहोरिएको भिडन्त ल्याउनेछ ।