रूपन्देही–३ उपनिर्वाचनः उम्मेदवार दर्तादेखि मतदानसम्मको कार्यतालिका सार्वजनिक

काठमाडौं । रूपन्देही जिल्ला प्रतिनिधि सभा क्षेत्र नम्बर ३ मा आगामी कात्तिक १७ गतेका लागि तोकिएको उपनिर्वाचनका लागि निर्वाचन आयोगले औपचारिक कार्यतालिका सार्वजनिक गरेको छ ।

निर्वाचन आयोगको निर्णयअनुसार उम्मेदवारको मनोनयन दर्ता आगामी असोज २१ गते बिहान १० बजेदेखि बेलुका ५ बजेसम्म निर्वाचन अधिकृतको कार्यालयमा हुनेछ । सोही दिन बेलुका ५ देखि ७ बजेसम्म उम्मेदवारको प्रारम्भिक नामावली प्रकाशित गरिनेछ ।

उजुरी दिने र निर्णय गर्ने समय
मनोनयन दर्तापछि उम्मेदवारविरुद्ध उजुरी दिनका लागि असोज २२ गते बिहान १० बजेदेखि दिउँसो ३ बजेसम्मको समय तोकिएको छ । त्यसपछिको समयमा अर्थात् असोज २२ को दिउँसो ३ बजेदेखि असोज २३ गते बेलुका ५ बजेसम्म उजुरी तथा मनोनयन पत्रहरूको जाँचबुझ गरिनेछ । सोही दिन बेलुका ५ देखि ७ बजेसम्म उम्मेदवारको संशोधित नामावली प्रकाशित हुनेछ ।

नाम फिर्ता र चुनाव चिन्ह
असोज २४ गते बिहान १० बजेदेखि दिउँसो १ बजेसम्म उम्मेदवारले आफ्नो नाम फिर्ता लिन सक्नेछन् । सोही दिन दिउँसो १ बजेदेखि ३ बजेसम्म अन्तिम उम्मेदवारहरूको नामावली प्रकाशित गरिनेछ । दिउँसो ३ देखि ६ बजेसम्म उम्मेदवारलाई चुनाव चिन्ह प्रदान गरिने निर्वाचन कार्यतालिकामा उल्लेख छ ।

मतदान मिति र समय
निर्धारित कार्यक्रमअनुसार कात्तिक १७ गते बिहान ७ बजेदेखि बेलुका ५ बजेसम्म मतदान हुनेछ ।

केही कानूनी प्रावधान
यस निर्वाचनमा प्रतिनिधि सभा र प्रदेश सभा सदस्य निर्वाचन, २०७९ अन्तर्गत समानुपातिक प्रणालीको बन्दसूचीमा नाम समावेश भएका व्यक्तिहरू उम्मेदवार बन्न नपाउने कानुनी व्यवस्था रहेको निर्वाचन आयोगले स्पष्ट पारेको छ ।

निर्वाचन आयोगले सबै राजनीतिक दल, उम्मेदवार तथा सरोकारवालालाई कार्यतालिका र कानूनी प्रावधानको पूर्ण पालना गर्न अनुरोध गरेको छ ।