गाजाको क्याफेमा इजरायली मिसाइल आक्रमण, कम्तीमा २० जनाको ज्यान गयो

गाजा । गाजाको एक भीडभाडयुक्त क्याफेमा इजरायली मिसाइल आक्रमण हुँदा कम्तीमा २० जनाको मृत्यु भएको छ । स्थानीय पत्रकार, सामाजिक अभियन्ता र सर्वसाधारणको जमघट हुने अल बाका क्याफ्टेरिया लक्षित बनेको अन्तर्राष्ट्रिय सञ्चार माध्यमहरूले जनाएका छन् ।

प्रत्यक्षदर्शीका अनुसार उद्धार टोलीले घटनास्थलबाट २० वटा शव निकालिसकेको छ भने अन्य थुप्रै घाइतेको उद्धार जारी छ । घटनास्थल नजिकै रहेका एक क्यामेरापर्सनले भने, ‘गाजाका अन्य क्षेत्रमा इन्टरनेट नचल्ने भएकाले म त्यहाँ वाइफाइको लागि पुगेको थिएँ । म क्याफे नजिक पुग्दै गर्दा विस्फोट भयो।’

सामाजिक सञ्जालमा सार्वजनिक गरिएको भिडियोमा आक्रमणपछिको बिनास र धुवाँ स्पष्ट देखिन्छ। भिडियो विश्लेषणले इजरायली मिसाइल प्रहार पुष्टि गर्छ ।

गाजाको उत्तर र मध्य भागलाई खाली गराउने उद्देश्यसहित इजरायली सेनाले पछिल्ला केही दिनयता हवाई आक्रमण तीव्र पारेको छ । यस्तो बेला जब अन्तर्राष्ट्रिय समुदाय (विशेषतः अमेरिका, संयुक्त राष्ट्रसंघ र युरोपेली संघ) ले इजरायलमाथि युद्धविरामको दबाब दिइरहेका छन्, त्यहीबीचमा यो क्याफे आक्रमण भएको हो ।

गत जनवरी १९ मा लागू गरिएको युद्धविराम मार्च महिनामा समाप्त भएपछि इजरायलले पुनः आक्रमण सुरु गरेको हो । त्यसयता राहत, औषधि र मानवीय सहायता पुर्‍याउन समेत कठिनाइ भएको थियो । ११ सातासम्म राहत प्रवेश रोकिएको अन्तर्राष्ट्रिय निकायहरूले उल्लेख गरेका छन् ।

हालसम्म पनि इजरायलले गाजामाथि आक्रमण जारी राखिरहेको छ, जसको चर्को आलोचना भइरहेको छ ।