प्रसिद्धको अविजित अर्धशतकले दिलायो नेपाललाई विजयी सुरुवात

काठमाडौं । एसीसी मेन्स यू–१६ इस्ट जोन कप क्रिकेट प्रतियोगितामा नेपालले विजयी सुरुवात गरेको छ। आइतबार भएको उद्घाटन खेलमा नेपालले सिंगापुरलाई ६ विकेटले पराजित गर्दै पहिलो खेलमा सहज जीत निकालेको हो ।

पहिले ब्याटिङ गरेको सिंगापुरले दिएको १३९ रनको लक्ष्य नेपालले ३३.३ ओभरमा ४ विकेट गुमाउँदै पूरा गर्‍यो । नेपालका ओपनर प्रसिद्ध जैसी नटआउट रहँदै ५५ रनको महत्वपूर्ण अर्धशतक बनाए भने रौनक श्रीवास्तवले ४० रन जोड्दै जितमा सशक्त योगदान दिए ।

बलिङमा कप्तान विपिनको प्रभावशाली प्रदर्शन

खेलको सुरुवातमै सिंगापुरलाई दबावमा राख्न सफल नेपालका बलरहरूमध्ये कप्तान विपिन प्रसाद शर्मा अग्रपङ्तिमा रहे । उनले १० ओभरमा १ मेडनसहित ३४ रन खर्चेर ४ विकेट लिए । अर्का प्रभावशाली बलर सचिन भट्टले ६.१ ओभरमा २ मेडन राख्दै ३ विकेट हात पार्दा सिंगापुरको पारी ३६.१ ओभरमै १३८ रनमा समेटिएको थियो ।

नेपालका लागि अभय यादव र शुभम खनाले पनि समान १–१ विकेट लिएर टिमलाई सहयोग पुर्‍याए ।

सिंगापुरका ब्याट्सम्यानहरूमध्ये कप्तान रियान नइकले ५३ रन बनाए भने ओपनर आहान भुथानदमले ३८ रनको योगदान दिए । तर बाँकी ब्याट्सम्यानहरू नेपालका बलरहरूसामु टिक्न सकेनन् ।

नेपालले अब दोस्रो खेल मंगलबार जापानसँग खेल्नेछ। पहिलो खेलमा जित निकाल्दै उत्साहित बनेको नेपाली टोलीले जापानविरुद्ध पनि विजय यात्रालाई निरन्तरता दिने लक्ष्य राखेको छ ।