भुटानबाट स्वदेश फर्कियो यू–२० महिला फुटबल टोली

काठमाडौं । एएफसी यू(२० महिला एसियन कप छनोटको यात्रा समाप्त गर्दै नेपाली महिला फुटबल टोली सोमबार भुटानबाट स्वदेश फर्किएको छ ।

अन्तिम खेलमा नेपालले उत्तर कोरियासँग ११–० को ठूलो अन्तरको हार बेहोरेको थियो । थिम्पुको चाङलिमिथाङ स्टेडियममा भएको उक्त खेलमा उत्तर कोरियाले पहिलो र दोस्रो हाफमा क्रमशः ५ र ६ गोल गर्दै सहज जित हात पार्‍यो ।

छनोट चरणमा नेपालले ३ खेल खेलेर जम्मा ४ अंक मात्र बटुल्न सक्यो । पहिलो खेलमा भुटानसँग १–१ को बराबरी खेलेको नेपालले दोस्रो खेलमा साउदी अरेबियामाथि १–० को जित निकालेको थियो । तर बलियो उत्तर कोरियासँगको अन्तिम भिडन्तमा भने टोली पूर्ण रूपमा दबिन पुग्यो ।

समूह ‘ए’ मा रहेका उत्तर कोरियाले तीनै खेल जित्दै ९ अंकका साथ समूह विजेता बनेर आगामी वर्ष थाइल्याण्डमा हुने एसियन कपका लागि टिकट कटायो । नेपाल भने समूह चरण पार गर्न असफल रह्यो ।

यद्यपि, प्रशिक्षक तथा टोली व्यवस्थापनले अनुभवलाई सकारात्मक रूपमा लिँदै युवा खेलाडीहरूको प्रदर्शनले भविष्यका प्रतियोगितामा राम्रो सम्भावना देखाएको बताएका छन् ।